Արիանա Գրանդեն միացել է «Ծանոթություն ծնողների հետ» ֆիլմաշարի նոր մասի դերասանական կազմին

Արիանա Գրանդեն միացել է «Ծանոթություն ծնողների հետ» պաշտամունքային հոլիվուդյան ֆրանշիզային։

Ինչպես հայտնել է Universal Pictures-ը, «Wicked» մյուզիքլի աստղը չորրորդ ֆիլմում կխաղա գլխավոր դերերից մեկը։ Գրանդեին կմիանան Բեն Սթիլլերը և Ռոբերտ Դե Նիրոն, որոնք կվերադառնան իրենց հայտնի դերերին։

Ֆիլմաշարը ներառում է երեք մաս՝ «Ծնողների հետ հանդիպում» (2000), «Ֆոքերների հետ հանդիպում» (2004) և «Փոքրիկ Ֆոքերներ» (2010)։ Եռագրության համակցված եկամուտները համաշխարհային կինովարձույթում գերազանցել են 1,16 միլիարդ դոլարը։

Նախորդ մասերում ամուսինների դերերը խաղացած Բլայթ Դաները և Թերի Պոլոն նույնպես նախատեսվում է, որ կվերադառնան նոր մասում։

Նոր ֆիլմի սցենարը և ռեժիսորական աշխատանքը վստահված են Ջոն Համբուրգին, որը բնօրինակ սցենարի հեղինակներից մեկն է։ Ըստ The Hollywood Reporter-ի՝ սյուժեն կրկին կշրջվի ծնողների հետ անհարմար ծանոթացման շուրջ, միայն թե այս անգամ դա կլինի Գրանդեի կերպարը, որը նշանված է Սթիլլերի և Պոլոյի որդիներից մեկի հետ։

Նրա կերպարը նկարագրվում է որպես «կոշտ, ըմբոստ և բացարձակապես սխալ նրա համար», ինչը, հավանաբար, կդառնա ընտանեկան ավելի մեծ քաոսի կատալիզատոր։

Արիանա Գրանդեն հաստատել է իր մասնակցությունը՝ Instagram-ի Stories-ում THR-ի և Deadline-ի նորությունների էկրանի լուսանկարներ հրապարակելով. «Այնքան ուրախ եմ լինել այս ընտանիքի մի մասը»,-գրել է երգչուհին: Նա նաև հրապարակել է օրիգինալ ֆիլմի կադր, որտեղ Դե Նիրոյի կերպարը Սթիլլերի կերպարին փորձարկում է ստի դետեկտորով։

Նկարահանումները նախատեսվում է սկսել առաջիկա ամիսներին։ Նախագծի պրոդյուսերներն են Բեն Սթիլլերը և Ռոբերտ Դե Նիրոն։