Լուվրը միջազգային ճարտարապետական մրցույթ է հայտարարում խոշոր վերանորոգման և «Մոնա Լիզայի» նոր դահլիճի համար  

Շաբաթներ տևած լարվածությունից և աշխատակիցների հանկարծակի գործադուլից հետո, որը հազարավոր զբոսաշրջիկների հերթ էր կանգնեցրել դարպասների մոտ, Փարիզի Լուվրը պաշտոնապես հայտարարել է միջազգային ճարտարապետական մրցույթի մեկնարկի մասին՝ երկար սպասված վերանորոգմանը նախապատրաստվելու համար, հաղորդում է Hypebeast-ը։

Հունիսի 27-ից Ֆրանսիայի ամենամեծ թանգարանը սկսել է գաղափարներ փնտրել իր խորհրդանշական տարածքը ընդլայնելու և այցելուների հսկայական հոսքը մեղմելու համար։ Ծրագրերը ներառում են նոր մուտքի և ստորգետնյա ցուցասրահի ստեղծում՝ հատուկ իր ամենաարժեքավոր ցուցանմուշներից մեկի՝ Մոնա Լիզայի համար։ 21 մասնագետներից բաղկացած ժյուրին հոկտեմբերին կընտրի հինգ եզրափակիչի մասնակիցների, իսկ հաղթողը կհայտարարվի հաջորդ տարվա սկզբին։

Նոր մուտքը նախատեսված է շենքի արևելյան ճակատի համար։ Ճարտարապետ Յո Մին Պեյի հայտնի ապակե բուրգից տարբերվող նոր նախագծերը պետք է ներդաշնակորեն տեղավորվեն 17-րդ դարի սյունազարդ ճակատի դասական ոճին։ Ամենամեծ անակնկալը Մոնա Լիզայի համար առանձին «ազատության տարածքն» է։ Լեոնարդո դա Վինչիի հայտնի գլուխգործոցը կտեղափոխվի Cour Courée բակի տակ գտնվող 3000 քառակուսի մետր մակերեսով նոր ստորգետնյա պատկերասրահ։ Այցելուները կկարողանան մուտք գործել միայն նախապես ամրագրված տոմսերով՝ սահմանափակ այցելության ժամանակացույցով՝ խուսափելու համար այն աղմուկից, որն այժմ գրեթե միշտ տիրում է նկարի շուրջ։

Մեծածավալ նախաձեռնությունը կապված է Լուվրի ենթակառուցվածքների վատթարացման և տարեկան գրեթե 9 միլիոն այցելու ընդունելու նրա կարողության վերաբերյալ աճող մտահոգությունների հետ։ Թանգարանի տնօրեն Լորենս դե Կարի ներքին նամակի համաձայն, որը «Le Parisien»-ին է փոխանցվել, շենքի մի մասը տառապում է արտահոսքերից և անկայուն կլիմայական պայմաններից, որոնք կարող են սպառնալ հավաքածուի անվտանգությանը։

Հունվարին Ֆրանսիայի նախագահ Էմանուել Մակրոնը հայտարարեց հնգամյա վերանորոգման ծրագրի մասին, որը նա անվանեց Լուվրի «Նոր վերածնունդ»։ «Le Monde»-ի տվյալներով՝ մեծածավալ վերանորոգման արժեքը գնահատվում է մոտ 400 միլիոն եվրո, որի մի մասը նախատեսվում է փոխհատուցել ԵՄ-ից դուրս գտնվող այցելուների համար տոմսերի գների բարձրացմամբ։