Fendi-ն վերադարձնում է հայտնի Spy Bag-ը՝ կրկին հույսը դնելով «It» աղջիկների վրա

2005 թվականին սոցիալական ասպարեզում հայտնվեց նոր «It» պայուսակ, որը կրում էին հայտնիները և այն ժամանակվա ազդեցիկ անձինք։ Խոսքը լեգենդար Fendi Spy Bag-ի մասին է, որը ստեղծվել է Fendi ապրանքանիշի աքսեսուարների և տղամարդկանց հավաքածուների գեղարվեստական տնօրեն Սիլվիա Վենտուրինիի կողմից։ Այն կրել են Նիկոլ Ռիչին, Լինդսի Լոհանը, Հիլարի Դաֆը, Գվեն Ստեֆանին և Սառա Ջեսիկա Փարքերը, հաղորդում է WWD-ն։

Պայուսակի փափուկ ձևը, որը հիշեցնում է կրուասան՝ կլորացված բռնակով և «գաղտնի» գրպաններով՝ շրթներկի, փողի կամ հեռախոսի համար, անմիջապես այն դարձրեց 2000-ականների կեսերի ցանկալի աքսեսուար։

Քսան տարի անց Fendi-ն  Spy պայուսակը վերադարձնում է նորաձևության պոդիում. պայուսակը կրկին դարձել է տան 100-ամյակին նվիրված 2025 թվականի աշնանային հավաքածուի մաս։ Հոբելյանական ցուցադրության ժամանակ Spy Bag-ը ներկայացվել է բազմաթիվ տարբերակներով՝ կաշվից, ատլասից, ոչխարի մորթուց, ջրաքիսից, կարակուլից և նույնիսկ օձաձկից։

Աստղերի նոր սերունդը՝ Օբրի Պլազայից մինչև Ռիտա Օրա և Բելլա Հադիդ, արդեն հասցրել են ցուցադրել ինչպես վինտաժային տարբերակները, այնպես էլ թարմ մոդելները։

Հետաքրքրություն առաջացնելու համար Fendi-ն մեկնարկել է առանձին թվային արշավ՝ Fendi Spy Bag Returns անվամբ, որը նկարահանել է լուսանկարիչ և ռեժիսոր Սթիվի Դենսը Նյու Յորքում։ Արշավը հղում է կատարում պայուսակի կարգավիճակին՝ որպես «IT պայուսակ» «IT աղջիկների» համար և խաղում է լրտեսական տեսախցիկների և թաքնված հսկողության գեղագիտության հետ. մոդելներ Ամելիա Գրեյը, Սյաո Վեն Ցզյուն և Գաբրիելտը նկարահանվել են հսկիչ տեսախցիկների «տեսադաշտի» տակ՝ մեգապոլիսների փողոցներում՝ պայուսակի մի քանի տարբերակով՝ երկնագույն կաշվից, վարդագույնից և ոչխարի մորթուց։

Spy Bag-ի վերադարձը Y2K աքսեսուարների նորաձևության ևս մեկ փուլ է։ 2000-ականների պաշտամունքային «վերադարձողներին» արդեն միացել են Dior Saddle-ը, Louis Vuitton Murakami-ն, Prada Re-Edition-ը, Chloé Paddington-ը և Balenciaga City-ն:

Բայց, թերևս, ոչ մի այլ մոդել այնքան մշակութային երևույթ չի դարձել, որքան Fendi Baguette-ը՝ «Սեքսը մեծ քաղաքում» հեռուստասերիալի շնորհիվ հայտնի դարձած պայուսակը: Այս տարի Fendi-ն հույսը դնում է նոստալգիայի և it-girls-ի նոր սերնդի վրա՝ ապացուցելով, որ նորաձևության աշխարհում ամեն ինչ ցիկլիկ է, և իսկական «it պայուսակը» կարող է տասնամյակներ շարունակ ապրել: