Հայը` բարձր նորաձեւության պոդիումին. Աշոտ Գրիգորյանը Հռոմում մասնակցել է Dolce & Gabbana-ի ցուցադրությանը
13:50 16 հուլիսի, 2025Կաստել Սանտ'Անջելոյի հին կամրջի վրա, որտեղ պատերը պահպանում են կայսերական Հռոմի արձագանքը, նախօրեին տեղի է ունեցել Dolce & Gabbana Alta Sartoria տղամարդկանց հավաքածուի շքեղ ցուցադրությունը։ Հավաքածուն ներկայացնող մոդելներից Աշոտ Գրիգորյանը բառացիորեն փայլել է ցուցադրության ամենատպավորիչ կերպարներից մեկով։
Աշոտը ծնունդով Վանաձորից է, բայց մեծացել է Ֆրանսիայում։ Նրա արտաքինը՝ արտահայտիչ, ուժեղ, մարտական կամքի թեթևակի շեշտադրմամբ, ներդաշնակորեն տեղավորվում է նորաձևության տան հայեցակարգի մեջ։ Ի դեպ, Աշոտը զբաղվում է բռնցքամարտով, և այս ներքին կենտրոնացումը, տղամարդկությունն ու կարգապահությունը զգացվում են նույնիսկ տեսախցիկի առջև։
Ներկայումս նա համագործակցում է այնպիսի գործակալությունների հետ, ինչպիսիք են Williams Agency-ն, Wilhelmina-ն, Boom Model Agency-ն և Wayf Hamburg-ը, ինչպես նաև՝ իտալական I'M BRAIN ապրանքանիշի դեմքն է։ Եվ հիմա նա Հռոմի Ալտա Սարտորիայի հերոսներից մեկն է։
Աշոտը ներկայացել է մի կերպարով, որը կարծես ոգեշնչված լինի Վատիկանի արարողակարգային շքեղությամբ և բարոկկոյով։ Ոսկեզօծ նախշերով զարդարված զգեստը, կարծես, որմնանկարից է վերցված. սև թավշյա հիմք, հարուստ ասեղնագործություն, դեկորատիվ ծոպեր, խաչով մեդալիոն՝ դրանում ամեն ինչ վերաբերում է քահանայական և կինեմատոգրաֆիկ շքեղությանը։
Dolce & Gabbana-ն այս սեզոնին ոգեշնչվել է եկեղեցական զգեստներով, և Աշոտ Գրիգորյանի նման կերպարներն էին, որոնք դարձան այս ամբողջ բարձր գեղագիտության մարմնացումը՝ տղամարդկային, ազնիվ, ուժով լի։
