Z սերնդի գրեթե կեսը փողը գերադասում է սիրուց

Z սերունդը (մոտավորապես 1990-ականների կեսերից մինչև 2010-ականների սկիզբ ծնված մարդիկ) ավելի ու ավելի է առաջնահերթություն տալիս ֆինանսական կայությանը, քան սիրուն։ Tawkify ծանոթությունների ծառայության նոր ուսումնասիրության համաձայն՝ երիտասարդների 46%-ը կընտրեր երկարաժամկետ ֆինանսական անվտանգությունը հարաբերություններից, իսկ գրեթե մեկ երրորդը նշել է, որ կվերադառնա նախկին զուգընկերոջ հետ՝ եթե վերջինը հարստանա, հաղորդում է NYP-ն։

«Փողը պարզապես բանկային հաշիվ չէ, այլ անվտանգություն, ազատություն և հավակնություն»,-ասում է Tawkify-ի գլխավոր ստեղծագործական տնօրեն և գլխավոր զուգընկեր Բրի Թեմփլը։ Նրա խոսքով՝ հարստության պատճառով նախկին զուգընկերոջ հետ վերամիավորումը ավելի քիչ կապ ունի փողի, քան այն բանի հետ, ինչ այն ներկայացնում է՝ ապագայի անվտանգություն և անձնական աճ։

2025 թվականի հունիսին 1000 ամերիկացիների շրջանում անցկացված հարցման արդյունքում սեռային և սերնդային բաշխումը ցույց տվեց հետաքրքիր միտումներ։ X սերունդը ամենազգույշն էր փողի հարցում. այս սերնդի 52%-ը նախընտրել է փողը սիրո փոխարեն։ Z սերունդը գրեթե շատ հեռու չէ։

Z սերնդի աղջիկներն ունեն որոշակի սպասելիքներ. յուրաքանչյուր տասներորդը ցանկանում է, որ իր զուգընկերը տարեկան վաստակի առնվազն 200,000 դոլար, և մեծ մասը չի համաձայնվի 80,000 դոլարից պակաս գումարին։

Մյուս կողմից, միլենիալները մնում են ռոմանտիկ. 59%-ը կնախընտրեր «վատ, բայց կախարդական» հարաբերությունները ֆինանսական կայունությանը։ Միևնույն ժամանակ, հարցված բոլոր ամերիկացիների 63%-ը նշել է, որ պատրաստ է ամուսնանալ սիրո համար, նույնիսկ եթե դա նշանակում է ֆինանսական դժվարություններ։

Ֆինանսական բաղադրիչը դառնում է ավելի կարևոր, քան քաղաքական հայացքները. Z սերնդի գրեթե կեսը կհրաժարվեր հանդիպել գործազուրկ մարդու հետ, նույնիսկ եթե համակրում է նրան։

Հոգեթերապևտ Մարիսա Քոհենը Z սերնդի այս վերաբերմունքը բացատրում է տնտեսական անկայունության տարիներով, այդ թվում՝ 2008 թվականի ճգնաժամի հետևանքներով, ուսանողական պարտքի աճով և համավարակի ընթացքում աշխատատեղերի կորստով։

«Նրանց համար ֆինանսական անվտանգությունը կենսական արժեք է, քանի որ հարաբերություններում ֆինանսական խնդիրները խանգարում են անձնական նպատակների և ծրագրերի իրականացմանը»,-նշում է Քոհենը։

Ժամադրությունների մասնագետները նշում են, որ փողի մասին խոսակցությունը արդեն որոշիչ գործոն է հարաբերությունների վաղ շրջանում։

Այնուամենայնիվ, սերը չի կորել. Z սերնդի 54%-ը դեռևս կընտրեր «աղքատ, բայց կախարդական» հարաբերությունները՝ հարուստ, էմոցիոնալ առումով սպառված հարաբերությունների փոխարեն։

«Z սերունդը հարաբերություններին նայում է լայն աչքերով»,-եզրակացնում է Բրի Թեմփլը։ «Նրանք սեր են ուզում, բայց միայն այն դեպքում, եթե այն համապատասխանում է անվտանգության, հավասարակշռության և իսկության իրենց պատկերացումներին»։