Կանանց սեռական փորձը հարաբերությունների երջանկության վրա ավելի մեծ ազդեցություն ունի, քան տղամարդկանցը

Սեռական հարաբերություններում բնական է ենթադրել, որ երկու զուգընկերների փորձը մեծապես ազդում է հարաբերությունների տևողության և որակի վրա: Սակայն սեռական փորձի տարբեր ոլորտներում հետազոտությունները ցույց են տալիս, որ սա ամբողջովին ճիշտ չէ: Հետերոսեքսուալ զույգերի մոտ կանանց սեռական փորձը ավելի ուժեղ ազդեցություն ունի հարաբերությունների երջանկության վրա, քան տղամարդկանց փորձը, գրում է «Psychology Today»-ը։

Համբույր

Կանանց համբույրի փորձը ավելի մեծ ազդեցություն ունի նրանց ապագա սեռական և ռոմանտիկ հարաբերությունների վրա, քան տղամարդկանց փորձը: Չնայած համբույրը բացառապես սեռական վարքագիծ չէ, այն հաճախ սեռական փորձի կարևոր մասն է կազմում: Տղամարդիկ և կանայք համբույրը տարբեր կերպ են ընկալում. կանայք համբույրի ժամանակ ավելի շատ ուշադրություն են դարձնում զուգընկերոջ բերանի համին և հոտին, քան տղամարդիկ՝ որոշելիս շարունակել համբույրը, թե ոչ:

Բացի այդ, համբույրը զգալի դեր է խաղում կանանց սեռական հարաբերություն ունենալու որոշումների կայացման գործում: Ավելի շատ կանայք (ի տարբերություն տղամարդկանց) ասում են, որ չեն ունենա սեռական հարաբերություն՝ առանց նախապես համբուրելու պոտենցիալ զուգընկերոջը և չեն համաձայնի սեռական հարաբերություն ունենալ վատ համբույրից հետո: Հարաբերությունների զարգացմանը զուգընթաց համբույրը կարևոր է մնում կանանց համար, մինչդեռ տղամարդկանց համար այն կորցնում է իր կարևորությունը:

Այսպիսով, կանանց համբույրների հետ կապված փորձը ավելի կարևոր է նրանց ապագա սեռական վարքագծի և երկարատև հարաբերությունների համար: Հետազոտողները ենթադրում են, որ համբույրը օգնում է կանանց գնահատել պոտենցիալ զուգընկերոջ առողջությունն ու որակը, ինչպես նաև լուրջ հարաբերությունների համար իրենց պատրաստակամությունը։

Օրգազմներ

Կանանց օրգազմները կարող են նաև ծառայել որպես պոտենցիալ երկարաժամկետ զուգընկերոջ որակի ցուցիչ: Կանայք, որոնց զուգընկերները ավելի գրավիչ և համաչափ են, ավելի հաճախ են օրգազմներ ունենում: Քանի որ մարմնի համաչափությունը և ֆիզիկական գրավչությունը կապված են գենետիկ որակի հետ, կանանց օրգազմները կարող են օգնել նրանց ընտրել ավելի հարմար զուգընկերներ երկարատև հարաբերությունների համար։

Ցանկություն

Կանանց` ավելի ուժեղ  սեռական ցանկությունը կապված է հարաբերություններից բավարարվածության հետ, քան տղամարդկանց ցանկությունը: Երկու ուսումնասիրություններ պարզել են, որ կանանց սեռական ցանկությունը ժամանակի ընթացքում ավելի շատ է փոխվում, քան տղամարդկանցը: Տղամարդկանց ցանկությունը մնացել է ավելի բարձր և ավելի կայուն ամբողջ ուսումնասիրության ընթացքում, մինչդեռ կանանց ցանկությունը նվազել է ամուսնության առաջին տարիներին։

Կանանց ցանկության նվազումը կապված է եղել երկու զուգընկերների ամուսնական բավարարվածության անկման հետ: Այնուամենայնիվ, քանի որ տղամարդկանց ցանկության մակարդակը մնացել է անփոփոխ, դա չի ազդել զույգի ընդհանուր բավարարվածության վրա։

Հետաքրքիր է, որ կանանց ցանկության նվազմանը հակառակ, սեռական հարաբերությունների հաճախականությունը մնացել է անփոփոխ։ Հեղինակները ենթադրում են, որ սեռական ակտիվությունը, որը տեղի է ունենում, երբ կանայք չեն ցանկանում դա, կարող է անբավարար լինել երկու զուգընկերների համար էլ։ Ե՛վ տղամարդիկ, և՛ կանայք ավելի շատ են հոգ տանում իրենց զուգընկերոջ սեռական փորձի մասին և ավելի բավարարված են զգում, երբ երկու զուգընկերներն էլ փոխադարձաբար հաճելի փորձառություններ են ունենում։