«Սերունդների Հարմոնիա»․ երաժշտական կամուրջ սերունդների միջև
10:30 28 հոկտեմբերի, 2025Հոկտեմբերի 26-ին Արամ Խաչատրյան համերգասրահում տեղի ունեցավ բացառիկ երաժշտական երեկո՝ «Նյու Ջեներեյշն Փրոջեքթի» նախաձեռնությամբ կազմակերպված «Սերունդների Հարմոնիա» խորագրով համերգը։ Երեկոն միավորեց տարբեր սերունդների ու երաժշտական ուղղությունների ներկայացուցիչներին՝ մեկ բեմում ստեղծելով երաժշտական յուրօրինակ համադրություն։
Երեկոյի գլխավոր գաղափարը երաժշտության հավերժությունն էր՝ որպես միավորող ուժ։ Համերգին մասնակցեցին լեգենդար ջազ դաշնակահար, ՀՀ ժողովրդական արտիստ Լևոն Մալխասյանը և սիրված երգչուհի Մաշա Մնջոյանը, որոնք իրենց անզուգական կատարումներով ստեղծեցին ջերմ և հոգեհարազատ մթնոլորտ։
Բեմում նրանց միացան նաև տաղանդավոր երաժիշտներ՝
• Նիկողայոս Վարդանյան – թավջութակ
• Կարեն Աստաբատյան – հարվածային գործիքներ
• Խաչիկ Սահակյան – դաշնամուր
• Հոսո Եգանյան – հարվածային գործիքներ
«Սերունդների Հարմոնիա»-ն դարձավ ոչ միայն երաժշտական երեկո, այլև խորհրդանշական հանդիպում՝ սերունդների, ոճերի և զգացմունքների միջև։ Յուրաքանչյուր կատարում պատմեց սեփական պատմությունը՝ ջազի ազատության, փոփի լույսի և հայկական երաժշտական հոգու մասին։
Երեկոն եզրափակվեց ջերմ ծափահարություններով՝ հաստատելով, որ երաժշտությունը շարունակում է լինել սերունդների միջև հնչող ամենագեղեցիկ լեզուն։
