Բարսելոնայի Սագրադա Ֆամիլիան դարձել է աշխարհի ամենաբարձր եկեղեցին

Լեգենդար Սագրադա Ֆամիլիա բազիլիկը՝ ճարտարապետ Անտոնի Գաուդիի անավարտ գլուխգործոցը, պաշտոնապես դարձել է աշխարհի ամենաբարձր եկեղեցին, այն բանից հետո, երբ այս շաբաթ բարձրացվեց և տեղադրվեց դրա կենտրոնական աշտարակի մի մասը։

Բազիլիկան այժմ ունի 162.91 մետր բարձրություն, ինչով փոքր-ինչ գերազանցում է Գերմանիայի Ուլմեր Մյունստերին, որը ռեկորդը պահում էր 1890 թվականից ի վեր (161.53 մետր)։

Սագրադա Ֆամիլիայի շինարարությունը սկսվել է 1882 թվականին, իսկ Գաուդին ստանձնել է նախագիծը 1883 թվականին։ Նա համեստ նեոգոթական դիզայնը վերածել է կատալոնական մոդեռնիզմի իսկական գլուխգործոցի։

Ճարտարապետի ողբերգական մահվան պահին՝ 1926 թվականին, նախատեսված 18 աշտարակներից միայն մեկն էր ավարտվել։ Գրեթե հարյուր տարի անց կռունկները դեռևս պսակում են բազիլիկան, բայց շինարարության վերջին փուլերն այժմ տեսանելի են անզեն աչքով։

Վերջին փուլը Հիսուս Քրիստոսի աշտարակն է՝ իր թագադրող խաչով, որը, ավարտվելուց հետո, կբարձրանա 172 մետր՝ դառնալով ոչ միայն աշխարհի ամենաբարձր եկեղեցին, այլև պատմության մեջ ամենաբարձր կրոնական շենքերից մեկը։

Բազիլիկայի կառուցումը բազմաթիվ դժվարությունների հանդիպեց։ Իսպանիայի քաղաքացիական պատերազմի ժամանակ անարխիստները այրեցին Գաուդիի արհեստանոցը՝ ոչնչացնելով նախագծերը և գիպսե մոդելները։ Նախագծի վերականգնումը տևեց տասնամյակներ։

Ժամանակակից խոչընդոտները չեն խնայել նաև Սագրադա Ֆամիլիային։ 2020 թվականին աշխատանքները լիովին դադարեցվեցին COVID-19 համավարակի պատճառով, որը զրկեց բազիլիկին իր հիմնական եկամտի աղբյուրից՝ զբոսաշրջությունից։ 2024 թվականին մուտքի վճար կատարեց գրեթե 4.9 միլիոն այցելու, որոնցից 15%-ը Միացյալ Նահանգներից էին։

Չնայած պատերազմներին, համաճարակներին և քաղաքական ցնցումներին՝ Գաուդիի գլուխգործոցը գոյատևել է, և այսօր էլ մնում է կենսունակ շինհրապարակ՝ միաժամանակ ծառայելով որպես ՅՈՒՆԵՍԿՕ-ի համաշխարհային ժառանգության վայր և Եվրոպայի ամենաշատ այցելվող տեսարժան վայրերից մեկը։

Սագրադա Ֆամիլիա հիմնադրամը հայտարարում է, որ կենտրոնական աշտարակի շինարարությունը կավարտվի 2026 թվականին՝ Գաուդիի մահվան հարյուրամյակին։ Հաջորդ տարի նախատեսվում են ճարտարապետի ժառանգությանը նվիրված մի շարք միջոցառումներ, այդ թվում՝ «Կասա Բատլյոն», «Պարկ Գուել» և «Կասա Միլա» (Լա Պեդրերա)։

Միևնույն ժամանակ, բազիլիկի ճակատային մասերի և ներքին հարդարանքի բարելավումը կշարունակվի, և աշխատանքների լիարժեք ավարտը նախատեսվում է 2030-ականների կեսերին։