Վիեննա Գալա՝ Հայաստանի ազգային ֆիլհարմոնիկից
20:19 13 հունվարի, 2026Երեկոյան գեղեցիկ հանդերձանքով ու հարդարանքով հանդիսատես, պարահանդեսային նրբաճաշակ երաժշտություն, փրփրուն գինի, տոնական ձևավորված ճեմասրահ, որտեղ սահում էին նրբագեղ պարային զույգերը։
«Արամ Խաչատրյան» համերգասրահում գեղեցիկ ավանդույթ է ձևավորվել վիեննական ամանորյա շնչով լցնել ձմեռային տոնական օրերը: «Վիեննա գալա»-ի երեկոյին՝ Հայաստանի ազգային ֆիլհարմոնիկ նվագախմբի կատարմամբ և մաեստրո Էդուարդ Թոփչյանի ղեկավարությամբ, հնչեցին, Շտրաուսների դինաստիայի գլուխգործոցները՝ նրբագեղ վալսերը, կրակոտ պոլկաները և հանդիսավոր քայլերգերը։ Երեկոյի պարային համարները վստահված էր «Բարեկամություն» պետական անսամբլի մենակատարներին։
Համերգը, ինչպես և ընդունված է, եզրափակվեց «Ռադեցկի» քայլերգով, որից հետո լեփ-լեցուն համերգասրահը պայթեց հոտնկայս ծափահարություններից:
Ի դեպ, Հայաստանի ազգային ֆիլհարմոնիկ նվագախումբը համերգից ընդամենը երկու օր առաջ էր վերադարձել Չինաստանի Ժողովրդական Հանրապետությունում կայացած մասշտաբային շրջագայությունից, որտեղ մեծ հաջողությամբ ելույթ է ունեցել իննը համերգով՝ Չինաստանի գլխավոր քաղաքների հեղինակավոր համերգասրահներում:
