Մեղեդիներ, որոնք չեն լռում․ «Առնո Բաբաջանյան 105»
15:35 24 հունվարի, 2026Երբ վերջին ակորդները լռեցին, դահլիճում դեռ երկար մնաց այն զգացողությունը, որ երաժշտությունը չի ավարտվել, այլ պարզապես տեղափոխվել է մարդկանց ներս։ «Առնո Բաբաջանյան 105» հոբելյանական համերգը Արամ Խաչատրյան համերգասրահում, որը կյանքի էր կոչվել «Նյու Ջեներեյշն Փրոջեքթ» նախաձեռնության կողմից, դարձավ ոչ թե անցյալին նվիրված հիշատակի երեկո, այլ կենդանի ապացույց, որ մեծ երաժշտությունը ժամանակից անկախ է։ Այդ երեկո Բաբաջանյանի մեղեդիները հնչեցին նոր շնչով՝ պահպանելով իրենց խորությունն ու հոգևոր ջերմությունը, և միավորեցին տարբեր սերունդների լսարանին մեկ զգացողության շուրջ։
Բեմում առանձնահատուկ էներգիա ստեղծեցին համերգի մասնակից երաժիշտները՝ Սրբուկը, Անուշ Բադալյանը, Հայկ Պետրոսյանը, Տիգրան Քախվեջյանը և Արամ Մելիքյանը, ովքեր իրենց անհատական մեկնաբանություններով նոր գույներ հաղորդեցին սիրված ստեղծագործություններին։ «Արմ. Սթրոնգ» նվագախմբի կենդանի ուղեկցությամբ, գեղարվեստական ղեկավար Դավիթ Գյոդակյանի ղեկավարությամբ, և Կարեն Քոչարյանի հաղորդավարությամբ, երեկոն վերածվեց հուզիչ երաժշտական պատմության, որտեղ nostalgia-ն միախառնվեց ներկայի ուժին։ Համերգը ևս մեկ անգամ հիշեցրեց, որ Բաբաջանյանի երաժշտությունը պարզապես չի հնչում․ այն ապրում է, զգացվում և շարունակում է խոսել ժամանակների միջով։
