Քրիստինա Ագիլերան «շփոթել է» Մեքսիկան Նյու Մեքսիկոյի հետ՝ զայրացնելով երկրպագուներին  

Քրիստինա Ագիլերան քննադատության տակ է հայտնվել այս շաբաթ Մեխիկո քաղաքում կայացած իր համերգից հետո։ Ագիլերայի ելույթը Պալասիո դե լոս Դեպորտեսում վիճահարույց է դարձել լեզվի անհարմար սայթաքման պատճառով. նա Մեքսիկայի մայրաքաղաքը անվանել է «Նյու Մեքսիկո»։

«Ես քեզ շատ եմ սիրում, Նյու Մեքսիկո», - դիմել է Ագիլերան հանդիսատեսին՝ պատահաբար անվանելով ամերիկյան նահանգը՝ այն երկրի փոխարեն, որտեղ տեղի էր ունենում համերգը։

Երկրպագուները զայրացել են նաև չափազանց կարճ համերգից. շոուն տևել է ընդամենը 55 րոպե, չնայած գովազդվում էր որպես երկժամյա համերգ։ Քննադատություններ են հնչել նաև երգչուհու ուշ մուտքի, համեստ դեկորացիայի և թույլ լուսավորության վերաբերյալ։

Սոցիալական ցանցերում հանդիսատեսը ցնցված էր. «Ես այնտեղ էի, իմ կյանքի ամենավատ համերգը։ Ես նրան սիրում էի, բայց այս համերգը էժան էր և անկեղծ չէր», - գրել է երկրպագուներից մեկը։

Մյուս օգտատերերը փորձել են կատակել իրավիճակի շուրջ. «Քրիստինան եկավ Մեխիկո, եկավ մեկ ժամ ուշացումով, անվանեց այն Նյու Մեքսիկո և երգեց ընդամենը 55 րոպե։ Բայց ես, միևնույն է, չեմ կարող ատել նրան»։

Երկրպագուները նաև բողոքել են երգացանկում հիթերի բացակայությունից. Ագիլերան բաց է թողել այնպիսի հայտնի երգեր, ինչպիսիք են «Candyman»-ը և «Come On Over»-ը։

Այնուամենայնիվ, կային նաև ավելի ներողամիտ երկրպագուներ։ «Նա երեք անգամ ասաց «Մեքսիկա» այդ անհարմար պահից առաջ», - նշել է հետևորդներից մեկը։ Մեկ այլ մարդ ավելացրել է. «Նա ամեն օր ելույթ է ունենում տարբեր քաղաքներում և ակնհայտորեն հոգնած է։ Մեկ փոքր սխալը պատճառ չէ նրան այդքան քննադատելու»։