Ռիչարդ Գիրը Թրամփին անվանել է «հրեշ», որը հենց առաջին օրը «քանդել է գրեթե ամեն լավ բան» Ամերիկայում  

Լեգենդար դերասան Ռիչարդ Գիրը մռայլ զուգահեռ է անցկացրել՝ ցույց տալու համար Միացյալ Նահանգներում ժողովրդավարության անկումը, միաժամանակ քննադատելով «մոլագար» Դոնալդ Թրամփին և նրա վարչակազմին։

Հոլիվուդյան աստղը Նորվեգիայում Օսլոյի ազատության ֆորումում վենեսուելա-նորվեգացի մարդու իրավունքների պաշտպան Թոր Հալվորսենի հետ զրույցում քննարկել է քաղաքականությունը, ազատությունը և պատմությունը։

«Մենք ապրում ենք այս մոլորակի վրա իմ ունեցած ամենամռայլ պահը։ Ինչպե՞ս է դա հնարավոր։ Որովհետև մենք քնած ենք։ Մեզ համար միևնույն էր։ Մենք չքվեարկեցինք։ Մենք իրականում չլսեցինք», - ասել է նա՝ հավելելով, որ ինքը «բավարար չափով չի արել՝ իր շրջապատի մարդկանց՝ մոտիկից և հեռու, արդյունավետորեն համոզելու համար, որ այս մարդուն Միացյալ Նահանգների նախագահ ընտրելը խելագարություն էր»։

Դերասանը նշել է, որ «առաջին օրը այս տղան քանդեց գրեթե ամեն լավ բան, որ կար ամերիկյան կառավարությունում և ամերիկյան ժողովրդի մեջ»։

«Մենք պետք է ճանաչենք նախազգուշական նշանները՝ այս հրեշների դիկտատուրան, թե որքան արագ է այն առաջ շարժվում», - հավելել է նա։ «Մենք պետք է զգոն մնանք»։

«Ոսկե գլոբուսի» դափնեկիրը համեմատություն է անցկացրել՝ ոգեշնչված Գերմանիայի նախկին նացիստական համակենտրոնացման ճամբար այցելությունից։ Գիրն ասել է, որ Դախաու այցելության ժամանակ իրեն զարմացրել է, թե ինչպես է տեղական ցուցահանդեսը պատկերել «գերմանական հասարակության և գերմանական կառավարության վերափոխումը և թե որքան արագ է դա տեղի ունեցել»։

«Լավ մարդիկ վերածվել են հրեշների», - մռայլորեն հայտարարել է դերասանը։ «Բայց դուք տեսնում եք, թե որքան արագ կարող է մեր աշխարհը խլվել մեզանից, եթե մենք քնենք։ Եվ մենք պետք է տեսնենք այս նշանները»։

Նա ընդգծել է, որ մարդիկ պետք է ճանաչեն, թե որքան արագ կարող է «հրեշների այս դիկտատուրան» իշխանությունը գրավել։ «Մենք չենք կարող պարզապես նստել և ասել. «Օ՜, կյանքը լավ է։ Ես լավ եմ։ Գիտեք, ես ուտելիք ունեմ։ Ես փող ունեմ։ Ես ամեն ինչ ունեմ։ Ես տուն ունեմ, ունեմ ևս մեկ մեքենա։ Ես հոգ եմ տանում ինձ մասին։ Ես լավ եմ։ Այո, գիտեմ, որ նա վատ տղա է, բայց դա լավ է», - կրքոտ ասել է Գիրը։ «Բայց դա լավ չէ։ Դա լավ չէ։ Դա երբեք լավ չի լինի»։