«Նա չար կարճլիկի բնավորություն ունի»․ Բրիտանիայի վարչապետը հրաժարվել է շանը Դաունինգ ստրիթ տանել Լարի կատվի պատճառով

Մեծ Բրիտանիայի վարչապետ Էնդի Բըրնհեմը հայտարարել է, որ իր ընտանի շունը՝ Աքսելը, կմնա Անգլիայի հյուսիսում, քանի որ «լեզու չի գտնում» Դաունինգ սթրիթի գլխավոր մկնորսի՝ Լարի կատվի հետ։

Մեկնաբանելով այս «կարևոր որոշումը»՝ վարչապետը հաստատել է, որ բիշոն ֆրիզեի և պուդելի խառնուրդ հանդիսացող Աքսելի համար Դաունինգ ստրիթ 10 հասցեում գտնվող նստավայրի մուտքը փակ է։

«Կարծում եմ՝ նա ստիպված կլինի մնալ հյուսիսում։ Հասկանո՞ւմ եք, նա «չար կարճլիկի» բնավորություն ունի։ Այո, նա ակնհայտորեն չի հաշտվի Լարիի հետ։ Չեմ կարծում, թե ազգն ինձ շնորհակալություն հայտնի, եթե բերեմ Աքսելին, և նա խախտի Լարիի անդորրը։ Այնպես որ, ավելի լավ է նա մնա տանը։ Ահա դրանք՝ ճակատագրական որոշումները, և այս գլխավոր քայլն արդեն կայացված է։ Այստեղ ամեն ինչ ավելի քան պարզ է», — BBC-ին տված հարցազրույցում ասել է քաղաքական գործիչը։

Վարչապետի հայտարարությանն ի պատասխան՝ «Լարի կատվի» էջում հայտնվել է լուսանկար, որտեղ նա նստավայրի ճաղավանդակի միջից սպառնալից դուրս է հանել ճանկերը ծառայողական ոստիկանական շան ուղղությամբ։ Հրապարակումն ուղեկցվել է հետևյալ մակագրությամբ․ «Շան բախտը բերեց, որ մեր միջև ճաղավանդակ կար․․․»։

Նախկին վարչապետ Քիր Սթարմերի պաշտոնավարման ընթացքում Լարին արդեն ստիպված է եղել Դաունինգ ստրիթը կիսել երկու այլ կատուների՝ ապաստարանից վերցված փիսիկի և սիբիրյան կատվի հետ։ Ավելի վաղ նա «բուռն ընդհարումներ» է ունեցել նաև Նովա շան հետ, որը պատկանում է Ռիշի Սունակի կնոջը։

Լարին եզակի քաղաքական ֆենոմեն է․ նա ընդունակ է համախմբել ողջ երկիրը՝ վեր կանգնելով կուսակցական ցանկացած տարաձայնությունից։ Փետրվարին լրացել է Դաունինգ ստրիթում նրա ծառայության 15 տարին․ այդ ընթացքում կատուն հասցրել է «պաշտոնավարել» արդեն վեց վարչապետների՝ Դևիդ Քեմերոնի, Թերեզա Մեյի, Բորիս Ջոնսոնի, Լիզ Թրասի, Ռիշի Սունակի և Քիր Սթարմերի օրոք։

Նրա պաշտոնական պարտականությունների մեջ են մտնում «անվտանգության համակարգերի ստուգումը, քնի համար անտիկվար կահույքի հարմարավետության գնահատումը», ինչպես նաև «շենքում մկների հիմնախնդրի հայեցակարգային լուծման որոնումը»։

Ինչ վերաբերում է Աքսելին, Բըրնհեմն ու նրա կինը նրան վերցրել էին Dogs Trust Shrewsbury ապաստարանից գրեթե տասը տարի առաջ։ Այս բոլոր տարիներին ընտանի կենդանուն գրեթե չեն ցուցադրել հանրությանը, և, թվում է, որ առաջիկայում Լոնդոնը նրան այդպես էլ չի տեսնի։