«Վարդերով տունը». Ելենա Արշակյանի ու Անահիտ Մխիթարյանի նոր նախագիծը հայտնի իրական պատմության հիման վրա է
21:05 21 օգոստոսի, 2026Սեպտեմբերի 7-ից «Արմենիա» հեռուստաընկերության եթերում կհայտնվի Ելենա Արշակյանի ու Անահիտ Մխիթարյանի նոր նախագիծը՝ «Վարդերով տունը»։ Նոր հեռուստասերիալը հեռուստադիտողին կներկայացնի հետաքրքիր ու ինտրիգային պատմություն, որը, հեղինակների խոստմամբ, կպահի լարվածության մեջ և կստիպի հետևել իրադարձությունների հետագա զարգացումներին։
Նախագծի սցենարի հեղինակն Անահիտ Մխիթարյանն է, պրոդյուսերը՝ Ելենա Արշակյանը, իսկ ռեժիսորը՝ Գոհար Արշակյանը։ Ելենա Արշակյանի խոսքով՝ այս անգամ ևս ստեղծագործական թիմին հաջողվել է ստանալ գեղեցիկ ու հետաքրքիր պատմություն, որի հիմքում իրական դեպքեր են։
«Այս անգամ էլ շատ սիրուն պատմություն ենք ստացել։ Մեր նկարահանումները կազմակերպել ենք ոչ միայն Հայաստանում, այլև արտերկրում»,-նշում է նա։
Հատկանշական է, որ նկարահանումների մի մասն իրականացվել է հենց այն երկրում, որտեղ տեղի է ունեցել սերիալի հիմքում ընկած իրական պատմությունը՝ Ռուսաստանի Դաշնությունում։ Սակայն իրական դեպքերը էկրանին ներկայացնելիս ստեղծագործական թիմը դրանց հաղորդել է նաև գեղարվեստական երանգներ։
«Այն պատմությունը, որը ներկայացնում ենք հեռուստադիտողին, իրական հիմքեր ունի։ Հուսով ենք՝ հեռուստադիտողը կհասկանա, թե որ պատմության մասին է խոսքը»,-NEWS.am STYLE-ի հետ զրույցում հավելեց Արշակյանը։
Սերիալն աչքի է ընկնում նաև իր բավական մեծ ու բազմազան դերասանական կազմով։ Նախագծում ընդգրկված են Նոնա Սաֆարյանը, Արսեն Լևոնյանը, Հմայակ Հակոբյանը, Ռուզաննա Վիթը, Դիանա Մխիթարյանը, Ադրինե Աճեմյանը, Էրիկ Կրբաշյանը և այլ դերասաններ։
Պրոդյուսերի խոսքով՝ «Վարդերով տունը» հետաքրքիր է նաև նրանով, որ այստեղ միասին հանդես են գալիս ինչպես տարիների փորձ ունեցող ու միմյանց հետ բազմիցս աշխատած արտիստներ, այնպես էլ դերասաններ, որոնք առաջին անգամ են խաղում միմյանց կողքին։ Բացի այդ, հեռուստադիտողը էկրանին կտեսնի նաև մարդկանց, ովքեր առաջին անգամ են նկարահանվում։
Իսկ, թե ինչպես են անցնում նոր նախագծի նկարահանումները՝ հետևեք ֆոտոշարքով։
Սյունե Առաքելյան