«Դուք ձեր խնդիրները չեք լուծել ու բարդույթները փոխանցում եք Գասպարին». Գոհար Ավետիսյանին քննադատել են 6-ամյա որդու դիետայի համար
20:28 25 օգոստոսի, 2026Գոհար Ավետիսյանը քաշի պատճառով դարձյալ հայտնվել է քննարկումների կենտրոնում։ Այս անգամ խոսքը ոչ թե իր, այլ 6-ամյա որդու՝ Գասպարի մասին է։ Դիմահարդարը տեսանյութ է հրապարակել, որտեղ երևում է, թե ինչպես է փոքրիկը կշռվում, ու պատմել է նրա սննդակարգի մասին։ Կշեռքը ցույց է տվել 38.9 կգ, ինչից հետո Գոհարը հրապարակմանը կից գրել է. «Դիետա... երկրորդ օր... քաշի ավելացում ունենք»։
View this post on Instagram
Տեսանյութը բուռն քննարկումներ է առաջացրել սոցցանցերում՝ հավաքելով հազարավոր մեկնաբանություններ։ Օգտատերերի մի մասը պաշտպանել է երեխայի սննդակարգին հետևելու որոշումը, իսկ մյուսները նկատել են, որ քաշի մասին խոսակցություններն ու կշռվելը պարբերաբար են հայտնվում մոր բլոգում։ «Երեխան գիտակցաբար է խոսում դրա մասին։ Ու նա իսկապես ավելորդ քաշ ունի։ Ավելի լավ է հիմա զբաղվել դրանով, քան հետո պայքարել ավելորդ կիլոգրամների դեմ»,- գրել է հետևորդներից մեկը։
Մյուսները դեմ են արտահայտվել քաշի մշտական վերահսկողությանը՝ նշելով, որ նիհարելու մասին նման զրույցները կարող են հոգեբանական խնդիրներ առաջացնել երեխայի մոտ։ Շատերը քննադատել են հենց այն փաստը, որ նման տեսանյութերը հանրայնացվում են։ «Պետք չէ որդու քաշի հանդեպ նման «հոգատարությունը» ի ցույց դնել բոլորին։ Թող իրեն քննարկի՝ իր քաշը, իր մարմինն ու իր սննդակարգը»,- գրել է օգտատերերից մեկը։ Քննարկվել է նաև Գասպարի ճաշացանկը. մարդիկ հիշատակել են տապակած միսը, ռոլլերն ու աղցանները՝ վիճելով, թե որքանով է նման սնունդը համապատասխանում երեխային։
Եղել են նաև Ավետիսյանին աջակցողներ. «Առողջ սնունդը նախևառաջ առողջություն է։ Շատ ճիշտ է անում, որ մանկուց է սովորեցնում։ Վատ բան չեմ տեսնում այստեղ. երեխան ուտում է, երեխան երջանիկ է»,- գրել է հետևորդներից մեկը։
Գասպարի դիետայի շուրջ աղմուկն առաջին անգամ չէ, որ բարձրանում է։ 2025 թվականի օգոստոսին, երբ տղան 5 տարեկան էր, Գոհարն արդեն ցույց էր տվել նրան կշեռքի վրա ու պատմել սննդակարգի մասին։ Այն ժամանակ փոքրիկը մոտ 500 գրամ ավելացրել էր ու տխրել։ Գոհարը փորձել էր հանգստացնել նրան՝ ասելով, թե ավելորդ կես կիլոգրամը կանհետանա զուգարան գնալուց հետո։ Այդ պատմությունն արագ տարածվեց ռուսական ԶԼՄ-ներում ու բուռն քննարկումներ առաջացրեց այն մասին, թե արդյոք արժե փոքրիկ երեխայի քաշը քննարկել տեսախցիկի առջև։
Մի քանի շաբաթ անց Ավետիսյանը դարձյալ ցուցադրեց որդուն իր բլոգում։ Այս անգամ նա հարցրեց Գասպարին. «Դու այլևս չաղ չես, ճի՞շտ է»։ Տղան դրական պատասխան տվեց։ Տեսանյութի հրապարակումից հետո քննադատությունների նոր ալիք բարձրացավ։
Այդ ժամանակ իրավիճակին անդրադարձան նաև հոգեբանները։ Մանկական հոգեբան Դարյա Դուգենցովան URA.RU-ին տված մեկնաբանությունում նշեց, որ նման արտահայտությունները կարող են բացասաբար ազդել երեխայի ինքնագնահատականի վրա։ «Նույնիսկ «դու այլևս չաղ չես» արտահայտությունը երեխայի կողմից կարող է ընկալվել որպես հաստատում, որ ինքը նախկինում չաղ է եղել»,- ասաց մասնագետը։ Նա խորհուրդ տվեց քիչ խոսել երեխայի կազմվածքի մասին և ավելի շատ ընդգծել նրա ջանքերն ու զարգացումը։
Մեկ այլ հոգեբան՝ Օլգա Իվանովան, նույնպես մեկնաբանել էր նախորդ տարվա պատմությունը։ Passion.ru-ի հետ զրույցում նա կոչ էր արել փոքրիկ երեխաներին դիետաներ չպահել և խիստ սահմանափակումների փոխարեն ձևավորել առողջ սննդակարգի սովորություններ։
Իրավիճակը քննարկվել էր նաև Parents.ru-ում։ Հոգեբան և ԿԲԹ-թերապևտ Ջամիլյա Կաշապովան այն ժամանակ ասում էր, որ երեխային չպետք է պատմել համացանցում նրա արտաքինը քննարկող անծանոթների մեկնաբանությունների մասին։ Ստացվում է, որ այսօրվա պատմությունը գրեթե կրկնում է նախորդ տարվա իրադարձությունները։
Շատ օգտատերեր առանձնահատուկ կշտամբեցին Ավետիսյանին նրա համար, որ ինքը տարիներ շարունակ պայքարել է ավելորդ քաշի դեմ, պատմել դիետաների, սահմանափակումների ու սեփական մարմնի հետ բարդ հարաբերությունների մասին, իսկ հիմա թույլ է տալիս, որ որդին դեռ մանկուց բախվի քաշի հետ կապված նույնպիսի սևեռուն ուշադրությանը։
«Ինքներդ մանկուց անցել եք ավելորդ քաշի դժվարությունների, բարդույթների ու նման բաների միջով։ Արդյունքում տղային այնքան եք կերակրել, որ հիմա դիետա է պահում... Դուք առաջինը պետք է թույլ չտայիք սա»,- գրել է օգտատերերից մեկը։
Մեկ այլ մեկնաբան հիշեցրել է Գոհարին իր սեփական փորձի մասին և մեղադրել նրան որդու մոտ սննդի հանդեպ ոչ առողջ վերաբերմունք ձևավորելու մեջ. «Չէ՞ որ ինքներդ էլ գիտեք, որ բոլոր դիետաները հակառակ ազդեցությունն են ունենում... որ պարզապես պետք է վնասակար ուտելիքը տնից հեռացնել, այլ ոչ թե մանկուց սովորեցնել մտածել սննդի ու կերածի մասին։ Դուք նրա մոտ ուտելու վարքագծի խանգարում (ՈւՎԽ) եք զարգացնում»։ «Պետք էր հենց մանկուց երեխային առողջ սննդակարգի սովորեցնել, այդ ժամանակ սթորիսներում այս ամբողջ կրկեսը սարքելու ու սեփական երեխային նվաստացնելու կարիք չէր լինի»,- նշված է մեկ այլ մեկնաբանությունում։ «Ինչո՞ւ երեխայի մոտ մանկուց ՈւՎԽ ձևավորել։ Նա մեծանում է, այս բոլոր թվերը չպետք է տեսնի։ Կարելի է առանց կշռվելու էլ։ Նրան աճելու համար ռեսուրս է պետք, երեխաների սնունդը չի կարելի սահմանափակել»։ «Ինչո՞ւ եք որդուն հանրային հալածանքի ենթարկում։ Նկարահանում եք նման վիճակո՞ւմ ու նետում գայլերի բերանը։ Խելքներդ թռցրե՞լ եք»։
Միևնույն ժամանակ, եղան նաև մարդիկ, որոնք այս պատմության մեջ տեսան ոչ միայն ընտանեկան հարց, այլև բլոգի համար հերթական տեղեկատվական առիթը։ Հետևորդները նկատել են, թե որքան շատ անձնական բովանդակություն է Ավետիսյանը հրապարակում սոցցանցերում, և ենթադրել են, որ որդու դիետայի պատմությունը նույնպես կարող է ուշադրություն գրավելու և դիտումներն ավելացնելու միջոց լինել։ Բլոգերի անձնական կյանքի վերաբերյալ բազմաթիվ հրապարակումների ֆոնին որոշ օգտատերեր Գասպարի մասնակցությամբ տեսանյութը ընկալեցին որպես բաժանորդներ հավաքելու ու քննարկումներ շատացանելու հերթական քայլ։