«Սա կեղտոտ հնարք է». Ջեյն Ֆոնդան քննադատել է Paramount-ին՝ Մարկ Ռուֆալոյին «լռեցնելու» փորձի համար՝ մեղադրելով հակասեմականության մեջ  

Paramount-WBD միաձուլման քննադատության համար Մարկ Ռուֆալոյի հասցեին հնչող հակասեմականության մեղադրանքների ֆոնին, դերասանուհի Ջեյն Ֆոնդան պաշտպանել է իր գործընկերոջը։

Երկու անգամ Օսկարի դափնեկիր և Առաջին Փոփոխության Կոմիտեի (Committee for the First Amendment) հիմնադիրը պաշտոնական հայտարարություն է տարածել։ Այնտեղ նա Ռուֆալոյի դեմ մեղադրանքները անվանել է «նրան հակասեմական կեղծ պիտակավորելու ցինիկ փորձ» և «գլխավոր խնդրից՝ մեդիաիշխանության վտանգավոր մոնոպոլիզացիայից ուշադրությունը շեղելու փորձ»։

«Մարկ Ռուֆալոն Առաջին Փոփոխությամբ իրավունք ունի խոսել քաղաքականության, հզոր կորպորացիաների և այս վտանգավոր միաձուլման մասին ու վերջակետ», - ասել է նա։ «Նրա քննադատությունը հակասեմական անվանելը կեղտոտ հնարք է, որը նպատակ ունի վարկաբեկել գործարքին դեմ գտնվողներին և խուսափել Paramount-ի համար անհարմար հարցից. պե՞տք է մեկ ընկերությանը տրվի այդպիսի հսկայական իշխանություն մեր կինոյի, հեռուստատեսության և նորությունների վրա»։

Հակամարտությունը բռնկվել է այն բանից հետո, երբ Մարկ Ռուֆալոն տեսանյութ է տարածել, որում պատկերված էր Oracle-ի գործադիր փոխնախագահ Սաֆրա Կացը։ Տեսանյութում քննարկվում էր Իսրայելի բանակին Ղազայի պատերազմի համար «խորապես վախեցնող տեխնոլոգիաներ» տրամադրելը։

Ի պատասխան՝ Paramount-ի ներկայացուցիչները հայտարարել են, որ իրենք «մտահոգված են ենթադրաբար գործարար վեճում հակասեմական արտահայտությունների օգտագործմամբ»։

Ինքը՝ Մարկ Ռուֆալոն, հակասեմականության մեղադրանքները անվանել է «հրեշավոր և հիմնովին անազնիվ»։

«Իսրայելի վարչապետի գործողությունները, ռազմական տեխնոլոգիաների պայմանագիրը կամ այն մատակարարող ղեկավարների գործողությունները քննադատելը նույնը չէ, ինչ հրեա ժողովրդին քննադատելը։ Նման կենսական երկխոսությունը անազնվորեն ներկայացվում է որպես Իսրայելի դեմ ուղղված։ Իմ տեսակետները հիմնված են բացառապես անձնական քաղաքական համոզմունքների վրա և ոչ մի կերպ չեն արտացոլում թշնամանք հրեա ժողովրդի նկատմամբ, որի նկատմամբ ես խորը սեր և հարգանք ունեմ»։

Մինչ ոլորտի շատ գործիչներ, այդ թվում՝ Հաննա Այնբինդերը (ով մեղադրանքները անվանել է «աբսուրդ») և Ջոն Քյուսաքը, բացահայտորեն աջակցել են Ռուֆալոյին, մի շարք կազմակերպություններ կողմ են քվեարկել Paramount-ին։ Մասնավորապես, Սայմոն Վիզենտալ կենտրոնը և Հակա-Զրպարտության Լիգան (ADL) աջակցել են դերասանի հակասեմիտիզմի մեղադրանքներին։

Հիշեցնենք, որ փետրվարին Netflix-ը դուրս եկավ Warner Bros.-ի համար պայքարից՝ հրաժարվելով բարձրացնել իր առաջարկը Paramount-ի Skydance-ի կողմից մեկ բաժնետոմսի համար 31 դոլար առաջարկի դեմ (այն բանից հետո, երբ Netflix-ը դեկտեմբերին WBD-ի հետ 82.7 միլիարդ դոլարի գործարք էր կնքել՝ Դեյվիդ Էլիսոնի ընկերության կողմից թշնամական կլանումից առաջ)։ Ապրիլին Մարկ Ռուֆալոն համագործակցել է փաստաբան Նորմ Այզենի հետ՝ կոչ անելով պետական պաշտոնյաներին կիրառել հակամենաշնորհային օրենքները և կանխել թշնամական կլանումը։