Հայտնի մաֆիոզ Ջոն Գոտտիի թոռն ամուսնացել է «մատնիչի» հետ բանտ նստելուց երկու օր առաջ

Հայտնի մաֆիոզ Ջոն Գոտտիի թոռն ամուսնացել է դաշնային բանտ տեղափոխվելուց ընդամենը երկու օր առաջ, ընդ որում՝ նրա ընտրյալն է դարձել այն կինը, որը նախկինում նրան մեղադրում էր ենթադրյալ դավաճանության պատճառով ծագած վեճի ընթացքում իրեն խեղդելու մեջ։ Այս մասին հայտնում է New York Post-ը՝ վկայակոչելով տղամարդու փաստաբանին։

40-ամյա Քարմայն Անյելոն օգոստոսի 10-ին ներկայացել է բանտ՝ COVID-19 համավարակից տուժածներին աջակցելու ծրագրով հատկացված պետական միջոցները հափշտակելու համար 15-ամսյա պատիժը կրելու։ Դրանից երկու օր առաջ նա ամուսնացել էր Արիանա Պուրանի հետ, հայտնել է նրա փաստաբանը։

Գամբինո հանցավոր կլանի հայտնի պարագլխի թոռը պետք է ճաղերի հետևում հայտնվեր դեռևս հունիսի 2-ին, սակայն երկու ամսով հետաձգում էր ստացել այն բանից հետո, երբ դատավորին հայտնել էր իր հիվանդ մորը՝ «մաֆիայի արքայադուստր» Վիկտորիա Գոտտիին, երիկամ նվիրաբերելու մտադրության մասին։

Անյելոն ընդունել է մեղքը ԱՄՆ Փոքր բիզնեսի վարչության և COVID-19-ից տուժածների վարկավորման ծրագրին մասնակցող մի քանի ֆինանսական հաստատությունների դեմ իրականացրած խարդախության մեջ։ Գործի տվյալներով՝ պատճառված վնասը կազմել է 943 300 դոլար։

Լրատվամիջոցների փոխանցմամբ՝ երիկամի փոխպատվաստման վիրահատությունը, որը դաշնային դատախազներն առաջարկում էին անցկացնել անգամ կալանքի տակ գտնվելու պայմաններում, այդպես էլ տեղի չի ունեցել։

Դեռ վերջերս Անյելոյի անունը շրջանառվում էր բոլորովին այլ աղմկահարույց պատմության մեջ։ Հունիսի 4-ին նրան հարձակման մեղադրանք էր առաջադրվել. դատախազության վարկածով՝ ենթադրյալ սիրավեպի պատճառով ծագած խանդի տեսարանի ժամանակ նա Իսթ Նորվիչի իր տանը ծեծել ու խեղդել էր Պուրանին։

Սակայն Անյելոյի՝ արդեն օրինական կինը ավելի ուշ լրագրողներին ասել էր, թե իրենց միջև ընդամենը «սովորական վեճ» է եղել։ Ձերբակալությունից հետո Վիկտորիա Գոտտին, ընդհակառակը, հարձակվել էր ապագա հարսնացուի վրա՝ նրան անվանելով «մատնիչ» ոստիկանություն ահազանգելու համար։

Չնայած այս սկանդալային պատմությանը՝ Պուրանն ու Անյելոն, միևնույն է, ամուսնացան՝ բառացիորեն նրա բանտարկվելու նախօրեին։

Անյելոն Գամբինո հանցավոր կլանի ամենահայտնի պարագլուխներից մեկի՝ Ջոն Գոտտիի թոռն է։

Ավելի վաղ Անյելոն մոր՝ Վիկտորիա Գոտտիի հետ նկարահանվել է «Growing Up Gotti» հայտնի ռեալիթի շոուում։