Գազարի լվացում՝ լվացքի մեքենայում. բլոգերի անսովոր հնարքը զայրացրել է օգտատերերին

Բլոգեր Հեզեր Բարնսը բուռն քննարկումների առիթ է դարձել՝ խոստովանելով, որ գազարը լվացել է լվացքի մեքենայով։

Սոցիալական ցանցերի աստղը, որը Ինստագրամում հայտնի է որպես «Our Barnes Yard», իր տան և ապրելակերպի մասին գրառումների շնորհիվ հավաքել է մոտ 300,000 հետևորդ։ Բարնսը պարբերաբար կիսվում է տան գաղափարներով, վերանորոգման խորհուրդներով և ինքնուրույն աշխատանքներով իր լսարանի հետ։

Այնուամենայնիվ, հենց նրա վերջին «խոհարարական հնարքն» է շփոթեցրել իր հետևորդներին։

Իր նոր տեսանյութում Բարնսը իր արարքը անվանել է «մի փոքր խելագար», բայց կոչ է արել իր հետևորդներին վստահել իրեն։ «Ես միշտ լվանում եմ իմ այգում աճեցրած գազարը լվացքի մեքենայի մեջ... Ես դա անում եմ տարիներ շարունակ», - ասել է նա։

Բլոգերը հողով ծածկված գազարները պլաստիկ տարայից դատարկում է լվացքի մեքենայի թմբուկի մեջ, փակում դուռը և մեքենան դնում սառը ջրով և առանց պտտման մեղմ ռեժիմի։ «Այնուհետև ես պարզապես թողնում եմ, որ դրանք պտտվեն»,-հավելել է նա։

Ցիկլի կեսին Բարնսը նկարահանել է գործընթացը, ապա ցիկլի ավարտից հետո վերադարձել է լվացքի մեքենային։ «Բում», - հայտարարում է նա՝ ցուցադրելով մի բուռ թաց, մաքուր բանջարեղեն։

Հետո Բարնսը հանում է գազարները և դնում խոհանոցի սեղանին։ Նա խորհուրդ է տալիս մեքենան դատարկ աշխատեցնել՝ կրկին օգտագործելուց առաջ թմբուկը լավ լվանալու համար։

Տեսանյութի վերջում բլոգերը տպավորիչ բերքը դնում է պահեստավորման համար՝ գրելով. «Իրավական նպատակներով. օգտագործեք լվացքի մեքենան միայն իր նպատակային նշանակության համար։ Ես պատասխանատու չեմ, եթե ինչ-որ բան այնպես չգնա, հա-հա»։

Այնուամենայնիվ, սոցիալական ցանցերի օգտատերերը ոգևորված չեն բանջարեղենի լվացման անսովոր մեթոդով։

«Ի՞նչ տեսա հենց նոր», - գրել է մեկնաբաններից մեկը։

«Անմիջապես դադարեցրեք սա», - կոչ է արել մեկ ուրիշը։

Երրորդ օգտատերը կատակել է. «Դուք երբեք չեք համոզի ինձ, որ այս գազարները Tide-ի պատիճների համը չեն ունենա»։

Մեկնաբանությունների ալիքից հետո Բարնսը կրկին անդրադարձել է այս հարցին իր Instagram-ի Stories-ում։ «Համացանցում մարդիկ շատ մտահոգված են գազարի տեսանյութով։ Ես շատ եմ ցավում», - ասել է նա։ «Մարդիկ ասում են, որ սա սադրանք է՝ զայրույթի և վրդովմունքի համար։ Բայց սա պարզապես իմ կյանքն է։ Ահա թե ինչպես եմ ես ապրում։ Ես միտումնավոր չեմ փորձում մարդկանց սադրել։ Բայց եթե դուք հիմա զայրացած եք կամ դարձել եք այս սադրանքի զոհը, ժամանակն է մի քանի անգամ խորը շունչ քաշել»։

Միևնույն ժամանակ, մասնագետները խստորեն խորհուրդ են տալիս չլվանալ մթերքները լվացքի մեքենայում՝ թունավոր քիմիական նյութերի և թաքնված մանրէների ազդեցության ռիսկի պատճառով։