Բեն Աֆլեքին փորձել են ծանոթացնել Շակիրայի հետ. դերասանն ասում է, որ չի ցանկանում նոր սեր գտնել

Բեն Աֆլեքը Ջենիֆեր Լոպեսից բաժանվելուց երկու տարի անց դեռևս չի շտապում վերադառնալ սիրային հարաբերություններին։ 54-ամյա հոլիվուդյան դերասանը խոստովանել է, որ իր հիմնական առաջնահերթությունները հիմա աշխատանքն ու երեք երեխաներն են, մինչդեռ անձնական կյանքը մղվել է երկրորդ պլան։

Աֆլեքը Entertainment Tonight-ին ասել է, որ գործնականում ժամանակ չի անցկացնում հանդիպումների վրա և նոր զուգընկերուհի չի փնտրում։

«Ես դրա համար շատ ժամանակ չունեմ։ Ես անընդհատ հանդիպումներ չեմ ունենում։ Սա իմ գերակա խնդիրը չէ այս պահին», - կիսվել է դերասանը։

Աֆլեքը շեշտել է, որ բավականին գոհ է իր ներկայիս կյանքից և անհրաժեշտություն չի զգում շտապել նոր հարաբերությունների մեջ։

«Ես գիտեմ, թե ինչն է ինձ համար իսկապես կարևոր։ Ես չեմ կարող կյանքում երկու բան ունենալ առաջին տեղում։ Իմ երեխաներն առաջին տեղում են։ Իսկ հետո կա իմ աշխատանքը, որը ես սիրում եմ», - բացատրել է նա։

Չնայած դերասանը չի բացառում ապագայում նոր սիրավեպը, նա չի պլանավորում միտումնավոր սեր փնտրել։

Հարցազրույցի ընթացքում լրագրողը նաև հարցրել է դերասանին The View-ի համահաղորդավարուհի Անա Նավարոյի հայտարարության մասին, որն ասել էր, որ փորձել է նրան ծանոթացնել կոլումբիացի երգչուհի Շակիրայի հետ՝ Լոպեսից բաժանվելուց հետո։

Նավարոյի խոսքով՝ գաղափարը ծագել է Շակիրայի Մայամիի համերգի ժամանակ, որին ներկա են եղել Մեթ Դեյմոնը, նրա կինը և դուստրերը։ Դեյմոնն ու Աֆլեքը վաղուց ընկերներ են, և հեռուստահաղորդավարը կարծում էր, որ երգչուհին, որն այդ ժամանակ նույնպես բաժանվել էր իր զուգընկերոջից, կարող էր լավ զույգ լինել դերասանի համար։

Նավարոն պնդել է, որ Դեյմոնը զգուշանում էր այդ գաղափարից, քանի որ Լոպեսն ու Շակիրան ընկերներ են։ Այնուամենայնիվ, հեռուստահաղորդավարը կարծում է, որ Աֆլեքի և Լոպեսի բաժանումից բավականաչափ ժամանակ է անցել, որպեսզի դերասանն ու երգչուհին ավելի լավ ճանաչեն միմյանց։

Աֆլեքը, սակայն, պնդել է, որ պատմության մասին առաջին անգամ լսել է լրագրողից։ «Անկեղծ ասած, ես առաջին անգամ եմ լսում նման անհեթեթությունների մասին։ Ես երբեք չեմ լսել դրա մասին։ Մարդիկ բամբասում են, պարզապես հորինում են», - նշել է Աֆլեքը։ Նա նաև կտրուկ ձևով ավելացրել է. «Ես ոչ մեկի հետ պայմանագրով չեմ ծանոթանում»։