Ծախսեց ամբողջ աշխատավարձն ու 2000 կիլոմետր անցավ երազանքներիս կնոջ համար, որը, պարզվեց, արհեստական բանականությամբ էր ստեղծված
16:22 16 հոկտեմբերի, 202649-ամյա բրազիլացի որմնադիր Էդիմար Ռոչա Մարտինսը, մոր մահը սգալով, երկար ճանապարհորդության մեկնեց՝ հանդիպելու այն կնոջը, որին, ինչպես կարծում էր, սիրահարվել է։ Սակայն, ավտոբուսում ավելի քան 36 ժամ անցկացնելուց հետո, նա դաժան հիասթափություն ապրեց. նրա սիրեցյալը արհեստական բանականության կողմից ստեղծված վիրտուալ կերպար էր։
Մարտինսը հավատում էր, որ կարող է նոր կյանք սկսել՝ շնորհիվ իրեն Ջեսիկա Օլիվեյրա կամ Ջեսիկա Ֆազենդեյրա անվանող գրավիչ կնոջ տեսանյութերի։ Իր գրառումներում նա ցուցադրում էր իդեալական գյուղական կյանք և տղամարդկանց հրավիրում էր տեղափոխվել իր ֆերմա։
Նրա սոցիալական ցանցերի էջը հավաքել էր ավելի քան 300,000 հետևորդ։ Կինը, ըստ լուրերի, խոստացել էր վճարել Էդիմարի ճանապարհածախսը և ֆինանսական աջակցություն ցուցաբերել նրան տեղափոխվելուց հետո։
Մոր մահից հետո Մարտինսն իրեն ավելի ու ավելի միայնակ էր զգում և հույս ուներ, որ նոր հարաբերությունները կօգնեն իրեն հաղթահարել այս դժվարին ժամանակահատվածը։
«Ես այստեղ եկա երջանկություն փնտրելու»,-խոստովանել է նա՝ բացատրելով, որ ցանկանում է գտնել մտերիմ մեկին իր կյանքի դժվարին շրջանից հետո։
Հոկտեմբերի 9-ին Էդիմարը մեկնեց Հյուսիսային Բրազիլիայի Իմպերատրիս քաղաքից: Երկու օր անց, գրեթե 2000 կիլոմետր անցնելուց հետո, նա հասավ Բելու Օրիզոնտե: Ավտոբուսային ճանապարհորդությունը տևեց ավելի քան 36 ժամ:
Հայտնվելով անծանոթ քաղաքում՝ տղամարդը քայլում էր փողոցներով՝ անցորդներին ցույց տալով իր սիրելիի լուսանկարները և հարցնելով, թե արդյոք նրանք ճանաչում են նրան: Սակայն ոչ ոք նրան չճանաչեց:
Շուտով պարզ դարձավ, որ Էդիմարի սիրելին իրականում երբեք գոյություն չի ունեցել. նրա մասնակցությամբ տեսանյութերը ստեղծվել էին արհեստական բանականության միջոցով:
Տղամարդը խոստովանում է, որ հենց իր միայնությունն էր, որ ստիպել էր իրեն հավատալ վիրտուալ սիրավեպի իսկությանը: «Երբեմն տանը միայնությունը մեծ խնդիրների է հանգեցնում մարդու կյանքում»,-նշում է նա՝ բացատրելով, թե ինչու է որոշել այդքան երկար ճանապարհորդություն կատարել:
Էդիմարի խոսքով՝ իր առցանց ընկերուհին հորդորել էր իրեն տեղափոխվել իր մոտ՝ խոստանալով համատեղ կյանք վարել ֆերմայում. «Դու կապրես այստեղ, ինձ հետ, ֆերմայում»։ Տղամարդը լուրջ է ընդունել այս խոսքերը և ճանապարհ ընկել։
Նա իր ամբողջ աշխատավարձը ծախսել է ճանապարհորդության վրա և անսպասելի հայտնագործությունից հետո գործնականում ապշած է մնացել։
Էդիմարը օգնություն է ստացել Բելու Օրիզոնտեի քաղաքային միգրանտների աջակցության ծառայությունից։ Նրանք նրան ապահովել են սնունդով, ցնցուղով և խորհուրդներով, թե ինչպես ճանաչել առցանց խարդախությունները։
Իշխանությունները նրան նաև օգնել են տուգանքի հարցում։ Այս աջակցության շնորհիվ նա կարողացել է լքել քաղաքը հոկտեմբերի 13-ին։
Չնայած Էդիմարը սկզբում մտածում էր Իմպերատրիս վերադառնալու մասին, նա, ի վերջո, որոշել է գնալ Տոկանտինս նահանգ, որտեղ ծնվել է։
Այս միջադեպը, ըստ տեղեկությունների, Բելու Օրիզոնտեում տեղի ունեցած երրորդ նմանատիպ միջադեպն է վեց ամսից էլ պակաս ժամանակահատվածում։ Երկու այլ տղամարդ նախկինում եկել էին քաղաք՝ հույս ունենալով հանդիպել առցանց կանանց, որոնց հետ ծանոթացել էի օնլայն, բայց նրանք նույնպես արհեստական ինտելեկտի կողմից ստեղծված կերպարներ են եղել։