Հոլլի Բերին պարտվել է նախկին ամուսնուն՝ որդու խնամակալության համար դատական պայքարում

Հոլլի Բերիի և նրա նախկին ամուսնու՝ Օլիվյե Մարտինեսի միջև դատական վեճը շարունակվում է։ Դատավորը մերժել է դերասանի՝ նախկին կնոջ դեմ պաշտպանական որոշում ստանալու պահանջը, սակայն ուժի մեջ է թողել այն որոշումը, որի համաձայն՝ նրանց 13-ամյա որդին՝ Մասեոն, հիմնականում բնակվելու է հոր հետ։ Բերին առայժմ չի կարողացել վերականգնել նախկին ժամանակացույցը, որի համաձայն՝ ծնողները երեխայի հետ ժամանակն անցկացնում էին հավասարապես։

Ինչպես հայտնում է TMZ-ը, դատարանը չի փոխել խնամակալության գործող կարգը։ Հարցը կրկին կքննարկվի նոյեմբերին, իսկ մինչ այդ զույգի որդին հիմնականում բնակվելու է Մարտինեսի հետ։

Պարբերականի տեղեկություններով՝ Բերին այլևս չի կարողանա որդուն գիշերելու թողնել իր տանը։ Միևնույն ժամանակ, դատարանը սահմանափակումներ չի մտցրել տոնական օրերին մոր հետ տղայի անցկացրած ժամանակի հարցում։ Դերասանուհին շարունակում է պահպանել համատեղ իրավական խնամակալության իրավունքը, ինչը նշանակում է, որ նա իրավունք ունի մասնակցելու որդուն վերաբերող կարևոր որոշումների կայացմանը։

Հակամարտության նոր սրման պատճառ է դարձել սեպտեմբերի 26-ին տեղի ունեցած միջադեպը։ Մարտինեսը նախկին կնոջը մեղադրել է վեճի ժամանակ որդու պարանոցից բռնելու և նրան խեղդելու փորձի մեջ։ Նրա խոսքով՝ միջադեպը տեղի է ունեցել այն ժամանակ, երբ տղան վիրտուալ իրականության խաղ էր խաղում։

Բերին հերքել է մեղադրանքները։ Նա հայտարարել է, որ ինքն ու որդին պարզապես կատակել և իրար հետ գոտեմարտել են՝ ընդգծելով, որ տղայի կոկորդից չի բռնել։

Դատական քննության ընթացքում Մասեոն նույնպես ցուցմունք է տվել դռնփակ նիստում։ Բերին դեմ է եղել դրան՝ մտավախություն ունենալով, որ նախկին ամուսինը կարող էր ազդել դեռահասի խոսքերի վրա։ Մարտինեսն իր հերթին պնդել է, որ գործում է որդու անվտանգության շահերից ելնելով։

Նոյեմբերին դատարանը կրկին կանդրադառնա խնամակալության հարցին։ Առայժմ Մասեոն կշարունակի հիմնականում բնակվել հոր հետ, իսկ երեխայի հետագա խնամքի և դաստիարակության կարգի վերաբերյալ վերջնական որոշում դեռ չի կայացվել։