Թրամփի ինքնագրով շոկոլադ և Սպիտակ տան վրայով թռչող ինքնաթիռ․ ինչով զարմացրեց Սպիտակ տան Հելոուինը

Սպիտակ տանը հյուրերին բաժանել են Դոնալդ Թրամփի ինքնագրով շոկոլադներ, նրանց գլխավերևով անցել է նախագահական ինքնաթիռը, իսկ տոնակատարության փոքրիկ մասնակիցների շարքում հայտնվել են խորհրդային տանկիստ և փտած բանան։ Այս տարի Դոնալդ և Մելանյա Թրամփների կազմակերպած Հելոուինի տոնակատարությունը լի էր անակնկալներով՝ արտասովոր զգեստներից մինչև իսկական օդային շոու։

Ամենաշատ քննարկված հյուրերից էին արտասովոր հագուստներով երկու երեխաները։ Տղան ներկայացել էր խորհրդային տանկիստի համազգեստով՝ գլխարկով, ԽՍՀՄ զինանշանով կոկարդով և «Տանկային զորքեր» գրությամբ թևքանշանով։ Նրա ուղեկցուհին ընտրել էր ռուսական ժողովրդական տարազը՝ ծաղկային նախշերով զարդարված սարաֆան և կոկոշնիկ՝ ռուսական ավանդական գլխազարդ։ Այս արտասովոր զույգի լուսանկարներն արագ տարածվեցին սոցիալական ցանցերում։

Սակայն նրանց հետ մրցակցում էր ևս մեկ պատանի հյուր։ Նա եկել էր կարմիր գույնի գիշերազգեստով, որի վրա պատկերված էին հենց Թրամփի դիմանկարները, 47 թվով շապիկով և MAGA գրությամբ գլխարկով։ «MAGA FOR LIFE» («MAGA՝ ընդմիշտ») գրությունն ամբողջացնում էր նրա կերպարը։ Դատելով ամեն ինչից՝ նախագահին դուր էր եկել այդ ընտրությունը։

Մեկ այլ երեխա որոշել էր կերպարանափոխվել ԱՄՆ հիմնադիր հայրերից մեկի։ Սպիտակ պարիկ, գաղութային ժամանակաշրջանի ոճով վերնազգեստ՝ և բավական համոզիչ պատմական կերպար։ Թրամփը նույնիսկ ինքնագիր էր թողել նրա պատրաստած պայմանական «պատմական փաստաթղթի» վրա։

Այդուհանդերձ, երեկոյի ամենաանսովոր զգեստներից մեկը շատ ավելի քիչ հայրենասիրական էր։ Երեխան ներկայացել էր փտած բանանի կերպարանքով․ սովորական վառ դեղին մրգի փոխարեն նրա հագուստը պատկերում էր մգացած կեղև՝ շագանակագույն և սև բծերով։ Դինոզավրերի, մինիոնների և այլ դասական կերպարների կողքին այս զգեստն, անկասկած, չէր կարող աննկատ մնալ։

Քաղցրավենիքն էլ էր արժանացել նախագահական շուքի։ Երեխաներին բաժանում էին Hershey's ապրանքանիշի հսկայական շոկոլադե սալիկներ՝ հատուկ փաթեթավորմամբ։ Դրանց մի կողմում պատկերված էր ԱՄՆ նախագահի կնիքը, իսկ մյուս կողմում՝ Հելոուինի շնորհավորանքն ու Դոնալդ և Մելանյա Թրամփների ոսկեգույն ինքնագրերը։ Սովորական շոկոլադ, որը նման փաթեթավորմամբ ստանալուց հետո, հավանաբար, անմիջապես ուտելու ցանկություն չէր առաջանա։

Բայց սա դեռ ամենը չէր։ Սպիտակ տան վրայով թռավ Air Force One նախագահական ինքնաթիռը՝ հյուրերի համար անսպասելի օդային անակնկալ մատուցելով։ Տոնական զգեստների, շոկոլադի ամբողջ կույտերի և նախագահական ինքնագրերի ֆոնին ինքնաթիռի հայտնվելը դարձավ տոնակատարության ևս մեկ տպավորիչ դրվագ։ Թվում է՝ այս տարի Սպիտակ տանը որոշել էին չսահմանափակվել պարզապես քաղցրավենիք բաժանելով։

 Լուսանկարները՝ Getty Images