Գաղտնի ամուսնության մասին լուրերի ֆոնին Սուկի Ուոթերհաուսը բացահայտել է Ռոբերտ Պատինսոնի հետ «մեծամասշտաբ» հարսանիք կազմակերպելու իր ծրագրերը

Սուկի Ուոթերհաուսը ակնարկել է, որ Ռոբերտ Պատինսոնի հետ իր հարսանիքը լինելու է իսկական շքեղ տոնակատարություն, գրում է Page Six-ը։

Երգչուհին Sunday Times-ին տված հարցազրույցում, որը հրապարակվել է կիրակի օրը, հազվադեպ մանրամասներ է հայտնել հայտնի դերասանի հետ իր հարաբերությունների մասին։

Չնայած այն լուրերին, թե զույգն արդեն ամուսնացել է 2024 թվականի մարտին դստեր ծնվելուց հետո, Ուոթերհաուսը նշել է, որ հարսանիքը դեռ չի կայացել։

Խոսելով այդ իրադարձության մասին՝ նա ասել է. «Կամ ամեն ինչ, կամ ոչինչ»։ Երգչուհին նաև նշել է, որ հարսանիքի կազմակերպումը դեռևս անորոշ ժամանակով հետաձգվել է՝ մինչև տարեվերջ։

«Եթե որոշենք դա անել, ապա մեծ խնջույք կկազմակերպենք՝ իսկապես շքեղ ու անմոռանալի տոնակատարություն»,- ասել է նա։

34-ամյա Ուոթերհաուսն ու 40-ամյա Պատինսոնը հանդիպում են 2018 թվականից։ Երգչուհին անդրադարձել է նաև իրենց զբաղված գրաֆիկների պայմաններում հարաբերությունները պահպանելու դժվարություններին։

«Գրեթե տասը տարի է անցել, և դա հրաշալի է»,- նշել է նա։ «Երբեմն ինքս ինձ ասում եմ՝ չեմ կարող հավատալ, որ իմ կյանքում նման բան կա, և չեմ կարող հավատալ, թե որքան երջանիկ եմ»։

«Դեյզի Ջոնսը և վեցը» սերիալի դերասանուհին վստահ է, որ ինքն ու «Մթնշաղ» ֆիլմաշարի աստղը հրաշալի ծնողներ են, չնայած իրենց ոչ սովորական ապրելակերպին։

Խոսելով իրենց երկու տարեկան դստեր մասին՝ նա ասել է. «Ինձ դուր է գալիս, թե ինչպես ենք մենք կազմակերպում մեր ընտանեկան կյանքը։ Մենք երկուսս էլ շատ կապված ենք նրա հետ»։

«Նա հրաշալի, երջանիկ աղջնակ է»,- հավելել է երգչուհին։

Պատինսոնն ու Ուոթերհաուսն առաջին անգամ նշանադրության մասին խոսակցությունների առիթ տվեցին 2023 թվականի դեկտեմբերին, երբ երգչուհին Լոնդոնում զբոսանքի ժամանակ ցուցադրեց մատնեմատին փայլող ադամանդե մատանին։

Լուսանկարը՝ Evan Agostini / Invision / Associated Press