Ոսկի պարունակող 2 հազար դոլարանոց քսուք․ The Times-ն առանձնացրել է մաշկը խոնավեցնող լավագույն լյուքս դասի միջոցները
23:01 11 նոյեմբերի, 2026Բրնձի ֆերմենտներով ճապոնական բանաձևերից մինչև 24-կարատանոց ոսկի և պլատին պարունակող քսուքներ․ շքեղ կոսմետիկայի շուկան առաջարկում է խնամքի միջոցներ, որոնց արժեքը համեմատելի է ոսկերչական զարդերի գների հետ։ The Times պարբերականը կազմել է մաշկի տարբեր տեսակների համար նախատեսված պրեմիում դասի խոնավեցնող միջոցների ընտրանի։ Դրանցից ամենաթանկի 50 մլ տարողությամբ տարան արժե ավելի քան 2 հազար դոլար։
Մասնագետները հիշեցնում են, որ խոնավեցման կարիք ունի ոչ միայն չոր, այլև յուղոտ կամ համակցված մաշկը։ Խնամքի միջոց ընտրելիս կարևոր է հաշվի առնել մաշկի վիճակը, զգայունությունն ու կարիքները, այլ ոչ թե միայն գինն ու ապրանքանիշի ճանաչվածությունը։
The Times-ի ընտրանու լյուքս դասի խոնավեցնող միջոցները
Orveda The Bio-Tech Emulsion — շուրջ 406 դոլար
Շիճուկի և քսուքի համադրություն՝ հարստացված ծովային ֆերմենտներով, կոմբուչայով, հիալուրոնաթթվով և մարգագետնային փրփրուկի սերմերի յուղով։ Նախատեսված է ջրազրկված և զգայուն մաշկի համար։
Chantecaille 24K Gold Cream Intense — շուրջ 535 դոլար
Բաղադրության մեջ ներառված են 24-կարատանոց ոսկու մասնիկներ, մետաքսի միկրոմանրաթելեր, պեպտիդներ և կերամիդների համալիր։ Քսուքն օգնում է պահպանել մաշկի պաշտպանիչ շերտն ու խոնավությունը։
Augustinus Bader The Rich Cream — շուրջ 333 դոլար (50 մլ)
TFC8 կոմպլեքսով քսուք, որը պարունակում է ամինաթթուներ, վիտամիններ և պեպտիդներ։ Խիտ կազմության շնորհիվ հատկապես հարմար է չոր մաշկի համար։
Chanel Sublimage L’Extrait de Crème — շուրջ 705 դոլար (50 գ)
Պրեմիում դասի Sublimage շարքի այս միջոցը պարունակում է հարթատերև վանիլի բաղադրիչներ, սկվալան և մատուտակի արմատի մզվածք։ Նախատեսված է երեկոյան խնամքի և մաշկի վերականգնման գործընթացները խթանելու համար։
La Prairie Life Matrix Haute Rejuvenation Cream — շուրջ 2 062 դոլար (50 մլ)
Ընտրանու ամենաթանկ միջոցն է։ Ծերացման գործընթացների ուսումնասիրություններով ոգեշնչված այս շվեյցարական քսուքը, ըստ արտադրողի, նպաստում է մաշկի խտության, ձգության և առաձգականության բարելավմանը։
Sensai Ultimate The Cream — շուրջ 921 դոլար (40 մլ)
Ինտենսիվ խոնավեցնող քսուք՝ սակուրայի մզվածքով, բրնձի թեփի յուղով և Koishimaru մետաքսով։ Հատկապես խորհուրդ է տրվում հասուն մաշկի համար։
Genaissance de la Mer The Serum Essence — շուրջ 918 դոլար (30 մլ)
Միջոցը պարունակում է հանրահայտ Miracle Broth համալիրի խտացված տարբերակը, որը ստեղծված է ֆերմենտացված ծովային ջրիմուռների, վիտամինների և հանքանյութերի հիմքով։ Նախատեսված է մաշկի պաշտպանիչ շերտն ամրապնդելու և ձգությունը բարելավելու համար։
111Skin Celestial Black Diamond Cream — շուրջ 865 դոլար (50 մլ)
Լոնդոնցի պլաստիկ վիրաբույժ Յանիս Ալեքսանդրիդեսի մշակած քսուքը պարունակում է NAC-Y2 համալիր, հիալուրոնաթթու և ալմաստի մասնիկներ, որոնք, ըստ արտադրանքի նկարագրության, ապահովում են մաշկի նուրբ շերտազատում։
Lyma Skin Serum and Cream — շուրջ 527 դոլար (50 մլ)
Խնամքի երկփուլ համակարգ, որը միավորում է շիճուկն ու քսուքը։ Ակտիվ բաղադրիչների թվում են SNAP-8 պեպտիդը, ֆերմենտացված վարսակը և կվերցետինը։