Երաժշտական իրարանցում Կալիֆոռնիայում. Դուա Լիպան, SZA-ն, Tame Impala-ն և լեգենդար Մադոննան կգլխավորեն «Coachella 2027» փառատոնը  

Ամիսներ տևած ինտրիգներից, թեժ քննարկումներից ու ենթադրություններից հետո համաշխարհային երաժշտական ինդուստրիայի ամենասպասված իրադարձություններից մեկի՝ «Coachella 2027» փառատոնի կազմակերպիչները վերջապես բացել են փակագծերը։ Հաջորդ գարնանը՝ ապրիլի 9-11-ը և 16-18-ը, Կալիֆոռնիայի Ինդիո քաղաքի «Empire Polo Club»-ի բեմը կվերածվի իսկական աստղաբույլի. փառատոնի գլխավոր հեդլայներներն են փոփ-դիվա Դուա Լիպան, R&B-ի թագուհի SZA-ն և ավստրալական հանրահայտ «Tame Impala» նախագիծը։

Այս երեք գերաստղերի համար էլ Կալիֆոռնիայի անապատ վերադառնալը խորհրդանշական է, սակայն Դուա Լիպայի դեպքում այն նաև պատմական նշանակություն ունի։ Եթե 2017-ին երգչուհին փառատոնին հայտնվել էր պարզապես որպես Մարտին Գարիքսի հատուկ հյուր, ապա 2027-ին նա կդառնա պատմության մեջ առաջին բրիտանացի սոլո արտիստուհին, ով կգլխավորի «Coachella»-ն։ Ինչ վերաբերում է SZA-ին, ով դեռ այս տարվա փառատոնին փայլել էր Ջասթին Բիբերի ելույթի ժամանակ, ապա նա օրեր առաջ արդեն իսկ ակնարկել էր իր մասնակցության մասին՝ Ինստագրամում հրապարակելով խոսուն «SZAChella» գրառումն ու ազդարարելով գալիք ալբոմի և շրջագայության մեկնարկը։ Իսկ ահա «Tame Impala»-ն գլխավոր բեմ կվերադառնա 2019 թվականի իր հաղթական ելույթից ութ տարի անց։

Սակայն փառատոնի գլխավոր անակնկալներից մեկը սպասվում է պարային տաղավարում, որտեղ որպես հեդլայներ հանդես է գալու փոփ-երաժշտության կենդանի լեգենդ Մադոննան։ Սա խորհրդանշական վերադարձ է 21 տարի անց. առաջին անգամ երգչուհին այս նույն հարթակը պայթեցրել էր դեռևս 2005-ին՝ իր լեգենդար «Confessions on a Dance Floor» ալբոմի թողարկման շրջանում։ Այս տարի թողարկելով սկավառակի երկրորդ մասը՝ «Confessions II»-ը, որն անմիջապես գրավեց ԱՄՆ-ի և Մեծ Բրիտանիայի հիթ-շքերթների առաջին հորիզոնականները, աստղը պատրաստ է կրկնել պատմությունը (ի դեպ, ավելի վաղ հերքվել էին լուրերը, թե նա ելույթ է ունենալու բրիտանական «Glastonbury»-ում)։

«Coachella 2027»-ի երաժշտական ներկապնակն աչքի է ընկնում աննախադեպ բազմազանությամբ։ Բեմ դուրս կգան այնպիսի սիրված արտիստներ, ինչպիսիք են Զառա Լարսոնը, Ռոբինը, Ֆիբի Բրիջերսը, Դեդի Յանկին և «Weezer» ռոք խումբը։ Միջազգային կոլորիտը կապահովեն իտալական «Måneskin»-ը, հարավկորեական K-pop աստղ Ջիսուն և «NCT» խումբը, ինչպես նաև Բեքի Ջին, Ադելան և «Drain Gang»-ը։ Բրիտանական երաժշտական «պատվիրակությունը»՝ Դուա Լիպայի գլխավորությամբ, կհամալրեն Ջորջա Սմիթը, լեգենդար «Underworld»-ը, Shygirl-ը, EsDeeKid-ը և «Lambrini Girls»-ը, իսկ երիտասարդ ու խոստումնալից արտիստների շարքում կփայլեն Underscores-ը, ռեփեր Nettspend-ը, «After» դուետը և Թիֆանի Դեյը։

Հիշեցնենք, որ այս տարվա փառատոնը գլխավորում էին Ջասթին Բիբերը, Քերոլ Ջին և Սաբրինա Քարփենթերը, որոնցից վերջինիս շոուն երաժշտական քննադատները որակել էին որպես «անթերի կատարմամբ և համարձակ տեսլականով գլխապտույտ ներկայացում»։

«Coachella 2027»-ի տոմսերի վաճառքը կմեկնարկի նոյեմբերի 13-ին, իսկ նրանք, ովքեր չեն կարողանա անձամբ ներկա գտնվել Կալիֆոռնիայում, արդեն 15-րդ տարին անընդմեջ հնարավորություն կունենան երկու ուիքենդների ելույթներին ուղիղ հեռարձակմամբ հետևել YouTube-ի միջոցով։