Միացված խոսափողը դավաճանեց Ավստրալիայի վարչապետին․ տղամարդկային արժանապատվության մասին նրա զրույցը լսեց ողջ աշխարհը

Ավստրալիայի վարչապետ Էնթոնի Ալբանեզեն զավեշտալի սկանդալի կենտրոնում է հայտնվել այն բանից հետո, երբ կլիմայի փոփոխության հարցերով նախարար Քրիս Բոուենի հետ նրա զրույցը ֆիքսել է միացված խոսափողը։ Քաղաքական գործիչները, չկասկածելով անգամ, որ իրենց լսում և նկարահանում են, կատակներ են փոխանակել այն մասին, թե ինչու չարժե բջջային հեռախոսը կրել տաբատի գրպանում։

Անհարմար միջադեպը տեղի է ունեցել ուրբաթ օրը՝ Թուրքիայում ընթացող COP31 կլիմայական համաժողովի ժամանակ։ 63-ամյա Ալբանեզեն Բոուենի հետ զրուցելիս է եղել հանդիպումների միջև ընկած ընդմիջմանը և նախ գործընկերոջը նախազգուշացրել է հեռախոսը պիջակի արտաքին կրծքագրպանում պահելու վտանգի մասին։

«Դա կարող է ազդել սրտիդ ռիթմի վրա»,- նշել է վարչապետը՝ նկատի ունենալով սրտի վրա սարքի հնարավոր ազդեցությունը։

«Ես հիմա նույնպես աշխատում եմ ավելի զգույշ լինել՝ դադարել եմ այն դնել տաբատիս գրպանը»,- պատասխանել է Բոուենը։

«Քո... առնանդամի՞ պատճառով»,- ճշտել է Ալբանեզեն՝ չկռահելով, որ խոսակցությունը ձայնագրվում է։

«Այո, առնանդամիս։ Դա, թերևս, սրտից էլ կարևոր է»,- արձագանքել է նախարարը, ինչից հետո երկու քաղաքական գործիչներն էլ ծիծաղել են։

Ավելի ուշ վարչապետի ներկայացուցիչը պարզաբանել է, որ պաշտոնական հանդիպումների միջև եղած դադարի ժամանակ քաղաքական գործիչներն ուղղակի կատակում էին։

Զրույցն ուշադրություն է գրավել նաև այն պատճառով, որ տղամարդու վերարտադրողական ֆունկցիայի վրա բջջային հեռախոսների հնարավոր ազդեցության հարցն իրականում ակտիվորեն ուսումնասիրվում է գիտնականների կողմից։ 2022 թվականին Environmental Research ամսագրում հրապարակված հետազոտության համաձայն՝ բջջային սարքերի էլեկտրամագնիսական ճառագայթումը կարող է կապված լինել սերմնահեղուկի որակի անկման և սերմնաբջիջների շարժունակության վատթարացման հետ։

Այնուամենայնիվ, մինչ օրս համոզիչ ապացույցներ չկան այն մասին, որ աճուկի հատվածում հեռախոս կրելն էրեկտիլ դիսֆունկցիա է առաջացնում։