«Եվրատեսիլ»-ում Ուկրաինայի ներկայացուցիչ. «Արամ MP3-ի երգն առաջիկա մրցույթի գլխավոր ֆավորիտներից է»
11:03 9 ապրիլի, 2014Ուկրաինական էստրադային երգչուհի Մարիա Երեմչուկն անցյալ տարվա դեկտեմբերին «Tick-Tock» երգով հաղթեց Ուկրաինայի «Եվրատեսիլ 2014» ազգային ընտրական փուլում եւ մայիսին Կոպենհագենում կայանալիք երգի մրցույթում ներկայացնելու է Ուկրաինան։ NEWS.am STYLE-ի հետ հարցազրույցում 21-ամյա Մարիան պատմել է իր, առաջիկա մրցույթի եւ Արամ MP3-ի երգի մասին։
Մարիա, ի՞նչ փոխվեց Ձեր կյանքում այն պահից, երբ իմացաք «Եվրատեսիլ»-ին Ձեր մասնակցության մասին։
Նույնիսկ չգիտեմ՝ ինչպես բացատրել։ Կյանքի նոր նպատակ ու պատասխանատվություն առաջացավ իմ մեջ, քանի որ ներկայացնելու եմ իմ երկիրը։ Ամեն օր ես աշխատում եմ, որպեսզի արժանավայել ներկայացնեմ Ուկրաինան։ Բայց երջանիկ եմ, որովհետեւ զգում եմ, որ Հայրենիքիս համար կարեւոր բան եմ անում։ Առօրյա կյանքում ես պարզապես երգչուհի եմ: Երգչուհի, ում երազանքը կատարվել է, թեեւ նշեմ, որ բեմում ես այնպիսին եմ, ինչպես կյանքում, դիմակ չեմ կրում։
Ինչի՞ մասին է Ձեր երգը։
Այդ ստեղծագործությունը պատմում է սիրո մասին, իրական զգացմունքների որոնումների մասին։ Ստեղծագործությունը լի է զգացմունքներով, կյանքն այնքան լի է չարությամբ ու դաժանությամբ, հուսով եմ, որ իմ երգը մրցույթի ընթացքում գոնե երեք րոպե կբարձրացնի մարդկանց տրամադրությունը։ Ինչ վերաբերում է երգի ներշնչանքին. նշեմ, որ իմ ներշնչանքի աղբյուրը ծնողներս են։ Հայրս մահացել է, երբ 2 տարեկան եմ եղել, բայց նրա երաժշտությունը, նրա ձայնն ինձ երգչուհի դարձրեցին, իսկ մայրս միշտ սատարում է ինձ եւ նրա կարծիքը շատ կարեւոր է ինձ համար։
Դուք լսե՞լ եք Հայաստանի մասնակից Արամ Mp3-ի Not Alone երգը։
Ես այն շատ անգամ եմ լսել։ Այդ երգը «Եվրատեսիլ»-ի գլխավոր ֆավորիտներից է։ Կարծում եմ՝ այն հզոր երգ է, այս տարի դաժան պայքար է լինելու։ Արամին հաջողություն եմ մաղթում եւ հույս ունեմ հանդիպել Կոպենհագենում։