Արամ MP3-ը՝ կարմիր գորգի վրա. Կոպենհագենում մեկնարկել է «Եվրատեսիլ-2014» մրցույթը
11:00 5 մայիսի, 2014Կիրակի երեկոյան Կոպենհագենում մեկնարկել է «Եվրատեսիլ-2014» երգի միջազգային մրցույթը: Մասնակից երկրների ներկայացուցիչները եւ պատվիրակության անդամներն անցել են 70 մետրանոց կարմիր գորգի վրայով: Շքերթը գլխավորել է «Եվրատեսիլ-2013»-ի հաղթող դանիացի Էմիլի դը Ֆորեսթը:
Նրանից հետո անցել են 37 մասնակից երկրների պատվիրակությունները, այդ թվում՝ Հայաստանի ներկայացուցիչ Արամ MP3-ը՝ հայկական պատվիրակության հետ:
Դրանից հետո քաղաքապետարանի պատմական շենքում սկսվել է մրցույթի մասնակիցների եւ ազգային պատվիրակությունների պատվին կազմակերպված ընդունելությունը:
Միաժամանակ, Կոպենհագենի «Եվրոակումբում» կայացել է ընդունելություն լրագրողների եւ հանդիսատեսի համար:
Մրցույթի կիսաեզրափակիչ փուլերը կանցկացվեն մայիսի 6-ին եւ 8-ին, իսկ եզրափակիչը՝ մայիսի 10-ին:
Արամը ելույթ կունենա առաջին կիսաեզրափակչում՝ առաջին համարի ներքո:
