25-ամյա միանձնուհին դարձել է իտալական «Ձայնի» հաղթող
12:34 6 հունիսի, 2014Սիցիլիացի 25-ամյա միանձնուհի Քրիստինա Սկուչչիան հաղթել է իտալական «Ձայնը» նախագծում. հաղորդում է BBC-ն։
Մարտին կայացած կույր լսումների փուլում միանձնուհին պարզապես ցնցել է ժյուրիի անդամներին իր կատարումով՝ երգելով Ալիշա Քիսի «No One» երգը (ելույթը ավելի քան 50 միլիոն դիտում է ունեցել YouTube-ում)։
Քրիստինան, ով մեկ ամիս առաջ շոուի ընթացքում երգել է Քայլի Մինոուգի հետ, նշել է, որ նա նախագծին չի մասնակցում կարիերա ստեղծելու համար, այլ «ուղերձ հղելու»։
Ի դեպ, Քրիստինայի ելույթը գրավել է նաեւ դերասանուհի Վուպի Գոլդբերգի ուշադրությունը, ով «Գործիր, քույր» ֆիլմում մարմնավորել է երգչուհի-միանձնուհու։
«Եթե դուք ցանկանում եք տեսնել քույրին գործողության մեջ, նայեք սա», -գրել է դերասանուհին Թվիթթերում՝ տեղադրելով Սկուչչիայի կատարման հոլովակը։