Երեկ՝ հունիսի 23-ին, երգչուհի-դիզայներ Անահիտ Սիմոնյանը «Ալ շեյխ» արաբական ռեստորանում նշեց իր 27-ամյակը:
Դեռեւս կեսգիշերից երգչուհին բազում շնորհավորական նամակներ եւ զանգեր է ստացել: Առաջինը շնորհավորել է ամուսինը՝ երգիչ Հայկոն, ով երեկոյի վերջում անակնկալ մատուցեց՝ երգելով «Ես քեզ սիրահարվել եմ» երգը, որը նվիրեց իր կնոջը:
«Բազում նվերներ եմ ստացել: Բայց երբեք նվերի արժեքին ուշադրություն չեմ դարձրել: Կարեւորը մարդու անկեղծությունն ու ուշադրությունն է: Շատ ուրախ եմ, որ կողքիս այդպիսի ընկերներ եւ հարազատներ ունեմ, ովքեր այդ օրն անմոռանալի դարձրեցին: Շնորհակալ եմ նաեւ համացանցում շնորհավորող ծանոթ-անծանոթ մարդկանց»,- NEWS.am STYLE-ի հետ զրույցում ասաց Անահիտ Սիմոնյանը:
Երգչուհու համար իր ծննդյան օրը ամենասիրած տոներից մեկն է.«Ես միշտ ուրախ եմ լինում այդ օրը: Բայց նշեմ, որ օրվա ընթացքում լինում են պահեր, որ տխրում եմ: Չեմ կարող ասել, թե ինչն է տրամադրությանս անկման պատճառ դառնում, բայց հետո այն շուտ անցնում է»:
Անահիտը ինչպես ամեն տարի, այս տարի նույնպես ծննդյան տորթի մոմերը փչելիս երազանք է պահել. «Չեմ ասի, թե ինչ է, որ իրականանա (ժպտում է)»:
Եվս մեկ անգամ NEWS.am STYLE շնորհավորում է երգչուհուն՝ մաղթելով նորանոր ստեղծագործական բարձրունքներ եւ անասելի երջանկություն:
Լուսանկարները՝ Արսեն Սարգսյանի