«Ոսկե Ծիրան» միջազգային կիոնփառատոնը տարիներ շարունակ համագործակցում է ՀՀ-ում օտարերկրյա մի շարք դեսպանությունների հետ, որոնց թվում են ԱՄՆ-ի, Ֆրանսիայի, Գերմանիայի եւ Լեհասատնի դեսպանատները։ Այսօր լրագրողների հետ հանդիպման ժամանակ վերոնշյալ երկրների դեսպանները խոսեցին փառատոնի եւ դրա հետ իրենց համագործակցության մասին։
ՀՀ Գերմանիայի Դաշնային Հանրապետության արտակարգ և լիազոր դեսպան Ռայներ Մորելը նշեց, որ «Ոսկե Ծիրան» փառատոնը մեծ իրադարձություն է ոչ միայն Հայաստանի համար, այլեւ տարածաշրջանի եւ անգամ տարածաշրջանից դուրս։ Ըստ նրա՝ փառատոնն արդեն մեծ հեղինակություն է ձեռք բերել աշխարհում շնորհիվ նաեւ կազմակերպիչների, ովքեր շրջում են տարբեր երկրներով եւ կապեր ստեղծում։
ՀՀ-ում Ֆրանսիայի դեսպան Անրի Ռենոյի խոսքով էլ կինոյի շնորհիվ ամուր կապ է ստեղծվել Հայաստանի եւ Ֆրանսիայի միջեւ։ Ապա դեսպանը ներկայացրեց փառատոնում ընդգրկված ֆրանսիական ֆիլմերն ու դրանց ռեժիսորներին՝ հավելելով, որ այդ ֆիլմերը թվով 17-ն են։
ՀՀ Լեհաստանի հանրապետության դեսպանության Առաջին խորհրդական, Քաղաքական բաժնի ղեկավար Ռոբերտ Ռոկիցկին նույնպես իր խոսքում նշեց, որ փառատոնը հեղինակավոր է եւ իրենց մեծ պատվով են տարիներ շարունակ մասնակցում դրան։
Հիշեցնենք, որ «Ոսկե Ծիրան» 11-րդ միջազգային փառատոնը կանցկացվի հուլիսի 13-ից 20-ը՝ Երեւանում։
Շ.Շ.
Լուսանկարները՝ Արսեն Սարգսյանի