Ռոմանտիկ ընթրիք. ընտրում ենք զգեստ

Երկուսի համար իսկական տոնի նախապատրաստությունն անկարեւոր մանրուքներ չունի։ NEWS.am STYLE - ը շարունակում է մանրամասն ուղղորդել կատարյալ ռոմանտիկ երեկոյի կազմակերպումը։ Երաժշտության ու բույրերի հարցն արդեն լուծել ենք։ Մնացել է ամենակարեւորը, կանաց հավերժ տանջող խնդիրը՝ ի՞նչ հագնել։ Իհարկե, կարող ես հագնել մինչեւ պորտ եւ մինչեւ պոչուկ բացվածքով վառ կարմիր սեքսուալ զգեստը։ Այն ճոխ ու կրքոտ գիշեր կապահովի, սակայն ընթրիքը, ցավոք, կսառի, քանի որ սեղանին կհասնեք միայն ննջասենյակից հետո, այն էլ՝ առավոտյան։ NEWS.am STYLE - ն առաջարկում է ռոմանտիկ ընթրիքի համար զգեստների մի քանի տարբերակ։

Նուրբ կիսաթափանցիկ զգեստ։ Այն սեքսուալ է, բայց՝ զուսպ։ Էրոտիկ ֆանտազիաներ կառաջացնի, բայց զուգընկերոջը չի հասցնի սահմանին՝ ստիպելով մոռանալ սեղանին սառող ուտելիքի մասին։

Ավելորդ ոչինչ չբացող այս զգեստը կփայլի սեղանին դրված բուրավետ մոմերի լույսի տակ՝ գրավելով զուգընկերոջ ողջ ուշադրությունը։ Ռոմանտիկ ընթրիքի մեղմ լույսի ներքո այդ զգեստով նման կլինես տեսիլքի՝ անորսալի ու հիասքանչ։ Մեկ ուսով զգեստը, թաքուն ոչինչ չբացելով, միշտ թողնում է էրոտիկության համ։

Այսպիսի զգեստով կլինես ցանկալի՝ ինչպես հունական աստվածուհի։ Քո սիրելին այդպիսի տպավորությունն, անշուշտ, շատ երկար կհիշի։ Իսկ այս զգեստն ինքնին կայտառություն ու պայծառություն է։ Եթե ռոմանտիկ ընթրիքի շարունակությունն անկողինը չէ, այլ՝ ասենք՝ անմոռանալի զբոսանքը կամ կինոթատրոնը, այս զգեստը կատարյալ կլինի։ Զույգին տրամադրելով ռոմանտիկայի, այն չի շեշտադրի սեքսը։ Քնքշություն, սեր եւ խենթություն, ահա որն է այս զգեստով անցկացրած երեկոյի նշանաբանը։

Տեքստը՝ Անահիտ Գրիգորյանի/ NEWS.am STYLE