Ֆիլմեր՝ ուրբաթ երեկոյան դիտելու համար. NEWS.am STYLE-ի ընտրությունը
20:14 18 հունիսի, 2015Առաջիկա կինո-ուրբաթը պրեմիերաներով լի է։ Այսօր ձեր ուշադրությանը կներկայացնենք «Գանմեն» եւ «Պոլտերգեյստ» ֆիլմերը, որոնք երկուսն էլ կարելի էր դիտել միայն այն պարագայում, եթե ուրիշ ոչինչ չունեք անելու ազատ ժամանակն անցկացնելու համար։
Չնայած «Գանմեն»-ում ընդգրկված դերասանական հիանալի կազմին՝ ֆիլմը բավականին երկար ու ձանձրալի է ստացվել։ Շոն Պենի եւ Խավյեր Բարդեմի մասնակցությամբ նկարահանված այս ինտելեկտուալ մարտաֆիլմը լի է երկխոսություններով, իսկ գործողությունները շատ քիչ են։ Ուստի, եթե մտածում եք, որ սպանություններով եւ գերլարված իրադարձություններով հարուստ ֆիլմ պետք է դիտեք, ուրեմն շտապեմ հիասթափեցնել ձեզ։ Ըստ իս՝ սա ոչ թե հոլիվուդյան դասական մարտաֆիլմ է, այլ լրտեսական թրիլեր՝ հոգեբանական դրամայի բնորոշ տարրերով։
Գլխավոր հերոս Ջիմ Տերյեն (Շոն Պեն) միջազգային վարձու մարդասպան է, որը Կոնգոյի նախարարի սպանությունից հետո իր մեղքն ապաշխարելու նպատակով մեկնում է Աֆրիկա եւ սկսում մարդասիրական գործունեություն ծավալել։ Բայց իհարկե, Ջիմի ընկերները չեն գնահատում այս ամենը եւ հետապնդում են նրան։ Ջիմը դիմում է իր նախկին գործընկերոջը՝ Ֆելիքսին (Խավյեր Բարդեմ)։ Սակայն վերջինս համաձայնում է օգնել Ջիմին միայն մեկ պայմանով՝ եթե նա ընդմիշտ հեռանա իր կյանքից, քանի որ երկու հանցագործները սիրում են նույն կնոջը...
«Պոլտերգեյստ» ֆիլմը Սթիվեն Սփիլբերգի 1982թ-ին նկարահանված համանուն ֆիլմի նոր տարբերակն է։ Նրանք, ովքեր դիտել են Սփիլբերգի ֆիլմը կհիասթափվեն. փորձը ցույց է տալիս, որ վերանկարահանված ֆիլմերը միշտ զիջում են բնօրինակներին։ Բավականին ծանոթ եւ տարածված իրավիճակ, որ ծնողները փորձում են փրկել իրենց դստերը գերբնական ուժերից։ Սակայն սյուժեն գրավիչ չէ հեռուստադիտողի համար, քանի որ հանգուցալուծումը կանխատեսելի է։ Բայց կան տեսարաններ, որոնք կստիպեն ձեզ սարսափից քարանալ։ Մի խոսքով, իմ գնահատականը՝ 3...
Յուլիա Վարդանյան