«Հիմա ես շատ փակ եմ ապրում, իմ ընկերները գրքերն ու ձայնապնակներն են». Տիգրան Մանսուրյան

«Հիմա ես շատ փակ եմ ապրում, բայց ունեմ շատ լավ ընկեներ. դրանք գրքերն ու ձայնապնակներն են». այս մասին այսօր LOFT-ում իր երկրպագուների հետ հանդիպման ժամանակ հայտարարեց կոմպոզիտոր Տիգրան Մանսուրյանը:

Մաեստրոն տարիներ առաջ ընկերություն է արել Սոս Սարգսյանի, Սերգեյ Փարաջանովի, Հրանտ Մաթեւոսյանի, Պարույր Սեւակի, Մարտիրոս Սարյանի հետ. «Աստված իմ, ի՜նչ ընկերություն էր: Սեւակը շատ կռվարար էր, պայթուցիկ, բայց եւ մեծ եղբոր պես, երբ մի բան էր առաջարկում, խնդրանքով էր ասում: Իսկ Սարյանի հետ ավելի շատ պապ ու թոռան հարաբերություններ էին, քան ընկերական»,-թախիծով իր երիտասարդության օրերը հիշեց Մանսուրյանը:

Մաեստրոյի պատասխաններն իր երկրպագուների մյուս հարցերին ներկայացնում ենք ստորեւ.

Հին օրերի երգը

Ես Արթիկում եմ մեծացել: Շիրակի դաշտերի երգերն են իմ հին օրերի երգերը:

Հայաստան վերադառնալու մասին

1947 թվականին ընտանիքով Բեյրութից տեղափոխվեցինք Հայաստան: Այդ տարիներին շատ դժվար էր ինտեգրվելը Հայաստանում: Հայրս շատ էր ցանկանում, որ ես երաժիշտ դառնամ, եւ արդեն այդ ծրագրով վերադառնում էինք: Կարծում եմ, եթե մենք մնայինք Բեյրութում, ես երաժիշտ չէի դառնա: Հայաստան տեղափոխվելը ճակատագրական էր:

Պատարագ գրելու մասին

Շատ եմ ցանկանում պատարագ գրել, քանի որ եկեղեցական երաժշտությունը պետք է կանոնակարգվի:

Կնոջ մասին

Ես միայնակ եմ ապրում: Իմ կինը, որի հետ ընկերություն ենք արել 47 տարի, արդեն 11 տարի է՝ ինձ հետ չէ: Միասին Կոնսերվատորիա ենք ընդունվել, միասին՝ ավարտել, ինքը՝ կարմիր դիպլոմով, ես՝ ոչ: Երաժշտագետ էր, բայց երբեք մանկավարժության ոլորտից չշեղվեց:

Շատ էր ցանկանում, որ մի ստեղծագործություն նվիրեմ իրեն, եւ երբ արդեն գիտեի, որ ծանր հիվանդ է, Չարենցի բանաստեղծություններից մեկի հիման վրա երգ գրեցի եւ նվիրեցի իրեն: Լավ կյանք ապրեցինք միասին:

Շուշան Շատիկյան