Նոյեմբերի 18-ին գյումրեցի գեղեցկուհի Լիլիթ Մարտիրոսյանը Հայաստանը կներկայացնի հեղինակավոր «Միսս Երկրագունդ» գեղեցկության մրցույթում:
NEWS.am STYLE-ը զրուցեց Լիլիթի հետ` պարզելու, թե ինչպես է վերջինս տրամադրված մրցույթին, ինչ է կարծում իր մրցակիցների մասին և ինչ ակնկալիքներ ունի մրցույթում իր մասնացությունից: Լիլիթը մեզ հետ կիսվեց նաև որոշ անձնական մանրամասներով:
-Լիլիթ, երբվանի՞ց եք զբաղվում մոդելային կարիերայով։
-2012 թ-ին մասնակցեցի «Միսս Հայաստան» մրցույթին՝ արժանանալով «Միսս Շիրակ» տիտղոսին։ Այնուհետև ինձ այս ասպարեզում աջակցեց «Ատեքս» նորաձևության տան տնօրեն Օլգա Լավրենկոն, և այդպես սկսեցի աշխատել այս ոլորտում։
-Իսկ ի՞նչ մասնագիտություն ունեք:
-Առհասարակ, շատ եմ կարևորում կրթությունը: Լավ եմ սովորել թե՛ դպրոցում, թե՛ ուսանողական տարիներին: Ավարտել եմ Գյումրիի Պրոգրես համալսարանի օտար լեզուների ֆակուլտետը, այնուհետև ուսումս շարունակել եմ Հայաստանի ամերիկյան համալսարանում: Հետագայում էլ ցանկություն ունեմ սովորել Լոնդոնում:
-Լիլիթ, ինչպե՞ս ստացաք Հայաստանը «Միսս Երկրագունդ» մրցույթում ներկայացնելու հրավեր:
-2015 թ-ին «Համաշխարհային գեղեցկության և նորաձևության լիգայի» նախագահ Աշոտ Խաչատրյանի կողմից ստացա «Top Model Հայաստան» մրցույթին մասնակցելու հրավեր: Հաղթելով այս մրցույթը` այնուհետև մասնակցեցի Եգիպտոսում կայացած «Top Model Աշխարհ» մրցույթին: Հենց այնտեղ էլ ինձ նկատեցին և առաջարկեցին մասնակցել «Միսս Երկրագունդ» մրցույթին, որը անցկացվելու է Վիեննայում: Սակայն մինչ այդ` նոյեմբերի 7-ին մեկնելու եմ Չինաստան` մասնակցելու «Միսս Բիկինի Տիեզերք 2015» մրցույթին:
-Հասցրե՞լ եք համացանցի միջոցով հետևել մյուս երկրների ներկայացուցիչներին: Ի՞նչ եք կարծում` ունե՞ք լուրջ մրցակիցներ:
-Ընդհանրապես, «Միսս Երկրագունդ» մրցույթը մասնակիցների թվով ռեկորդակիր է համարվում: Այս տարի էլ մրցույթին մասնակցում են ավելի քան 100 երկրների ներկայացուցիչներ: Համացանցի միջոցով արդեն հասցրել եմ ընկերանալ Պորտուգալիայի, Կանադայի և Գերմանիայի ներկայացուցիչների հետ: Ինչ վերաբերում է մյուս բոլոր երկրների մասնակիցներին` կարող եմ ասել, որ բոլորն էլ շատ գեղեցիկ են:
-Առհասարակ, ի՞նչ սպասելիքներ ունեք մրցույթից:
-Մրցույթին շատ դրական եմ տրամադրված, սակայն չունեմ ոչ մի ակնկալիք: Աշխատում եմ սպասումներով չապրել, որ հետո չհիասթափվեմ: Կարծում եմ` պետք է ապավինել միայն Աստծուն:
Նախորդ մրցույթին մասնակցելիս շատ խոչընդոտներ ունեցա, ընդհուպ մինչև ահաբեկչական զանգեր: Սակայն շատ ուրախ եմ, որ իմ ընտանիքը միշտ կողքիս է: Ուզում եմ շեշտել, որ հովանավորներ չունեմ և ոչ-ոքից օգնություն չեմ սպասում: Նաև ուզում եմ շնորհակալություն հայտնել Աշոտ Խաչատրյանին, ում շնորհիվ պատիվ ունեմ Հայաստանը ներկայացնել այս հեղինակավոր մրցույթում:
-Լիլիթ, համոզված ենք` շատ տղաների կհետաքրքրի` արդյոք մեր գեղեցկուհու սիրտը զբաղվա՞ծ է:
-Ոչ, սիրտս ազատ է (ժպտում է):
Սյունե Առաքելյան
Լուսանկարները տրամադրել է Լիլիթ Մարտիրոսյանը