Դմիտրի Շեպելեւի թիկնապահին շտապ վիրահատել են
11:34 10 դեկտեմբերի, 2015Արդեն մի քանի օր է ռուսական շոու բիզնեսը քննարկում է Ժաննա Ֆրիսկեի քաղաքացիական ամուսնու ու նրանց որդու վրա կատարված հարձակումը: Հանրահայտ հեռուստահաղորդավարի վրա հարձակվել են կովկասյան արտաքինով անձինք՝ Ժաննա Ֆրիսկեի հոր գլխավորությամբ:
Շոումենի վրա հարձակումից հետո նրա թիկնապահներից մեկին շտապ վիրահատել են: Նրան տեղափոխել են մայրաքաղաքային կլինիկա:
Իրավապահները պարզում են, թե ով է հարձակվել Շեպելեւի ու նրա որդու վրա ու ծեծել թիկնապահին՝ ջարդելով նրա մատներն ու քիթը, հայտնում է «Комсомольская правда»-ն։
Մինչդեռ Շեպելեւին արդեն հարցաքննել են: Մոտ ժամանակներս իրավապահները կարող են հարցաքննության կանչել նաեւ նրա ընդդիմախոսին՝ Վլադիմիր Ֆրիսկեին:
Նշենք, որ ոստիկանները նաեւ հարցաքննում են այն մարդկանց, ովքեր պատահարի ժամանակ շենքի մուտքում են գտնվել, եւ տուժած թիկնապահին: Ստուգումների արդյունքներով կընդունվի ընթացակարգային որոշում՝ գործող օրենսդրության համապատասխան:
Մինչդեռ Վլադիմիր Ֆրիսկեն հրաժարվում է մեկնաբանել հարձակումը:
«Ես մտադիր չեմ մեկնաբանել այդ հիմարությունը, բոլոր հարցերը՝ Շեպելեւին»,-ասել է նա: