Խորհուրդ ներքին ձեւավորման մասնագետից. կահավորում ենք մանկական սենյակը (ֆոտո)

Մանկական սենյակի ձեւավորումն իսկապես մեծ նշանակություն ունի երեխայի անձի զարգացման գործում։ Սենյակի հարմարավետությունից ու հաճելի լինելուց հաճախ կախված է երեխայի սովորելու ցանկությունը, կյանքի նկատմամբ հետաքրքրությունը, տարբեր տաղանդների եւ ունակությունների զարգացումը։ Մանկական սենյակն անջնջելի հետք է թողնում մադրու հետագա ողջ կյանքի վրա, ազդում է բնավորության ձեւավորման եւ անհատի զարգացման վրա։

Յուրաքանչյուր երջանիկ ծնող երազում է իր երեխային հեքիաթային մանկություն ապահովել։ Եւ շատերն են կողմ այս գաղափարին։ Ամեն տարի ձեւավորողներն ավելի ու ավելի կատարյալ ու մտածված ներքին հարդարման առարկաներ են մշակում։ Այսօրվա դրությամբ, ձեւավորման շնորհիվ մանկական սենյակը կարող է յուրաքանչյուր երեխային անհատապես հարմար իսկական հեքիաթային ճամփորդություն լինել։

NEWS.am STYLE-ը, խորհուրդ ստանալու համար որոշեց դիմել երիտասարդ ու հեռանկարային ձեւավորող Ազատ Լոքմագյոզյանին։ Եւ այսպես, մանկական տարածքը կահավորելիս հատկապես ինչի՞ն է պետք ուշադրություն դարձնել։

«Մանկական սենյակը ձեւավորելու համար պետք չէ խուսափել վառ երանգներից, ընդհակառակը, առավելագույն ռիսկի դիմեք՝ համատեղելով վառ ու ակիվ գույները։ Վառ շեշտադրումներն օգտագործեք հիմնականում դետալների համար», - պատմեց Ազատը։

Ինչ վերաբերում է մանկական կահույքին, ապա ձեւավորողը խորհուրդ է տալիս ուշադրություն դարձնել, որ այն սուր անկյուններ չունենա։ Դրանից բացի, կենցաղային իրերը պետք է էկոլոգիապես մաքուր նյութերից լինեն։

Եւս մեկ խորհուրդ Ազատից. «Փորձեք չնկատելու աստիճան սովորական դարձած ձեզ շրջապատող իրերն օգտագործել անսովոր նշանակությամբ։ Եւ վերջում, հիշեք, սենյակը պետք է հանգրվան լինի ոչ միայն երեխայի, այլ նաեւ նրա գաղտնիքների ու երազանքների համար»։

Ավելի մանրամասն Ազատ Լոքմագյոզյանի աշխատանքներին կարելի ծանոթանալ նրա պաշտոնական կայքում։