Լինդսի Լոհանը «Пусть говорят» շոուին մասնակցելու համար պահանջել է հանդիպում Պուտինի հետ
14:11 22 օգոստոսի, 2016Համաշխարհային աստղերը տարբեր երկրներից հրավերներ ստանալիս ներկայացնում են իրենց պահանջները, որոնք բավարարվելու դեպքում սիրով համաձայնում են առաջարկին։ Սովորաբար այդ պահանջները լինում են մասնավոր օդանավ, բարձրակարգ հյուրանոց, անվտանգության ապահովում, դիմահարդար, վարսահարդար, համապատասխան սնունդ։ Սակայն պարզվում է, Լինդսի Լոհանի ռայդերը (պահանջների ցուցակը) փոքր-ինչ տարբերվում է։
Հուլիսին Լոհանն ու իր ռուսաստանցի ընտրյալը՝ միլիոնատեր Եգոր Տարաբասովը (հայտնի գործարար Դմիտրի Տարաբասովի որդին), հայտնվել էին սկանդալային պատմության մեջ։ Դերասանուհին հայտարարել էր, որ 23-ամյա Եգորը ցանկանում է սպանել իրեն։ Նրա գոռգոռոցից արթնացել էին հարեւանները եւ ոստիկանություն կանչել։ Իսկ երբ իրավապահները ժամանել էին հասցեով, տեսել էին կոտրված մուտքի դուռը, ներս մտել, սակայն զույգն արդեն հեռացած էր եղել։
Այս դեպքի վերաբերյալ ռուսական «Пусть говорят» շոուն ցանկացել է հատուկ ռեպորտաժ պատրաստել եւ հրավիրել է Լոհանին։ Բնականաբար, խմբագրությունը պատրաստ է եղել իմանալ հանրահայտ դերասանուհու ռայդերը։
Այսպիսով, 30-ամյա դերասանուհին պահանջել է՝ մասնավոր թռիչք, անվտանգություն, Ռուսաստան մուտքի մեկ տարվա արտոնագիր, 500000 բրիտանական ֆունտ ստերլինգ, վարսավիր, դիմահարդար ու մատնահարդար՝ օդանավում, շքեղ պենտհաուս։ Բայց ամենահետաքրքիրը ցուցակի հետեւյալ երկու կետերն են՝ հանդիպում ՌԴ նախագահ Վլադիմիր Պուտինին եւ մի քանի լուսանկար նրա հետ։
TMZ-ի փոխանցմամբ՝ դերասանուհին բանակցել է շոուի կազմակերպիչների հետ, որոնք համաձայնել են նրա մի քանի պահանջներին։
Հիշեցնենք, որ մարտի սկզբին հայտնի էր դարձել, որ 30-ամյա ամերիկուհի դերասանուհի Լինդսի Լոհանը հանդիպում է ռուսաստանցի գործարար Եգոր Տարաբասովի հետ, որը սեփական բիզնես ունի Մեծ Բրիտանիայում. նրան է պատկանում լոնդոնյան Home House Estates անշարժ գույքի գործակալությունը, եւ նա նաեւ մոսկովյան բանկերից մեկի բաժնետերերից է:
Հետո հաղորդվել էր, որ Լոհանը նշանվել է Եգորի հետ՝ չնայած դերասանուհու ներկայացուցիչն անմիջապես հերքել էր տեղեկությունը: Բայց գեղեցկուհու ձախ ձեռքի մատնեմատին հայտնված «նշանադրության» մատանին ծնունդ էր տվել ապագա ամուսնության մասին լուրերին:
Իսկ ամռանը Լոհանն ու Եգորը խզեցին հարաբերությունները, քանզի դերասանուհին երիտասարդին մեղադրում է դավաճանության մեջ։
Աղբյուրը՝ Daily Mail