Աներևակայելի թեթև աղցան` վարունգով և անանուխով. NEWS.am STYLE-ի բաղադրատոմսը
19:09 17 սեպտեմբերի, 2016Չնայած այս աղցանի հիմնական բաղադրիչները վարունգն ու համեմունքներն են, պետք է «հարգանքի տուրք մատուցել» անանուխին, որի համն ու բույրը յուրահատուկ է դարձնում այս պարզ աղցանը։
Ըստ հունական տխուր մի առասպելի, անդրշիրիմյան աշխարհի աստված Աիդի սիրելին էր հավերժահարս Մենթան։ Խանդոտ Պերսեփոնեն, իմանալով ամուսնու սիրո մասին, պատառ-պատառ է անում իր մրցակցուհուն։ Իսկ արյան կաթիլներից աճում է հոտավետ մի բույս՝ անանուխ։ Նաեւ ասում են, որ Մենթային Աիդն է անանուխ դարձրել։
Անանուխի հայրենիքը համարվում է Միջերկրական ծովը։ Այսօր այն կարելի է հանդիպել կլիմայական տաք պայմաններով ցանկացած տարածաշրջանում։ Աշխարհում այս բույսի մոտ 25 տեսակ և 100 ենթատեսակ կա։
Եվ այսպես, աղցան պատրաստելու համար մեզ հարկավոր է՝
4 վարունգ
2 պճեղ սխտոր
1 թեյի գդալ չոր անանուխ
1 թեյի գդալ քացախ
2 թեյի գդալ ձիթապտղի յուղ
աղ
Վարունգը հարկավոր է կտրատել։
Մանրացրնել սխտորը, ապա ավելացնել չոր անանուխը, քացախը, ձիթայուղը և աղը։
Խառնում ենք և թողնում 10 րոպե։
Նշենք, որ աղցանը նախընտրելի չէ պատրաստել թարմ անանուխով, քանի որ այն բոլորովին այլ համ ունի։
Ձեր՝ Մաշա