Սարիկ Անդրեասյանի «Երկրաշարժ» ֆիլմը այլեւս չի շարունակի իր պայքարը «Օսկարի»՝ «Լավագուն օտարերկրյա ֆիլմ» անվանակարգի հնգյակում հայտնվելու համար:
Ամերիկյան կինոակադեմիան ներկայացրել է այն 85 ֆիլմերի անունները, որոնք կշարունակեն իրենց պայքարը տվյալ անվանակարգում: Ցավոք, հայկական արտադրության ֆիլմը չի ընդգրկվել այդ ցուցակում:
Ցուցակում ընդգրկվել են ֆիլմեր Արգենտինայից, Ավստրիայից, Բրազիլիայից, Չինաստանից, Կուբայից, Ֆինլանդիայից, Եգիպտոսից, Հնդկաստանից, Ռուսաստանից եւ այլ երկրներից:
Հայաստանի ազգային կինոակադեմիայի որոշմամբ՝ համաշխարհային կինոմրցանակաբաշխությանը ներկայացվել էր նաեւ ռեժիսոր Սարիկ Անդրեասյանի «Երկրաշարժ» ֆիլմը:
NEWS.am STYLE-ի հետ զրույցում կինոակադեմիայի գլխավոր քարտուղար Րաֆֆի Մովսիսյանը նշել էր.
«Ակադեմիան ունի 26 անդամ, որոնցից փակ քվեարկոթյանը մասնակցել են 24-ը: Հենց նրանց քվեարկությամբ էլ ներկայացված երեք ֆիլմերից (Ջիվան Ավետիսյանի «Վերջին բնակիչը», Դավիթ Սաֆարյանի «28:94 տեղական ժամանակ» եւ Սարիկ Անդրեասյանի «Երկրաշարժ») ընտրվել է Սարիկ Անդրեասյանի «Երկրաշարժ ֆիլմը» (9 ձայնով)»:
«Օսկարի» ամենամյա մրցանակաբաշխությունն այս տարի կանցկացվի 89-րդ անգամ: Հեղինակավոր մրցանակաբաշխությունը տեղի կունենա փետրվարի 26-ին՝ Հոլիվուդի Դոլբի Թատրոնում:
Աղբյուրը՝ www. variety.com