Արդեն գրել էինք, որ Քանյե Ուեսթը Մոսկվա է ժամանել՝ միայն իրեն հայտնի քանյեուեսթական գործերով:
Բայց հստակ հայտնի է, որ Քիմ Քարդաշյանի ամուսինը հանդիպել է ռուսաստանցի դիզայներ Գոշա Ռուբչինսկիի հետ:
Ըստ Life-ի՝ Քանյեն ու դիզայները բանակցել են եւ պայմանավորվել համագործակցել: Ռուբչինսկին կսկսի աշխատել Ուեսթի ստեղծած Yeezy կոշիկի ապրանքանիշի համար:
Ուեսթը Մոսկվայում մեկ օր է անցկացրել եւ որոշել Ռուբչինսկիին ներգրավել իր ապրանքանիշի ստեղծագործական թիմի աշխատանքներին:
Ռուբչինսկին ռուսաստանցի ամենահայտնի դիզայներն է: Նա Gosha Rubchinskiy ապրանքանիշի սեփականատերն է, որը ներառված է ֆրանսիական Comme des Garcons նորաձեւության տան կազմում: Սա այլ ապրանքանիշերի հետ Ռուբչինսկիի առաջին համատեղ նախագիծը չէ: Ավելի վաղ նա պարբերաբար աշխատել է Reebok-ի, Fila-ի եւ Topman-ի հետ:
Yeezy ապրանքանիշի կոշիկների շարքը, որը Քանյե Ուեսթը թողարկում է Adidas-ի հետ համատեղ, աշխարհում ամենատարածվածներից է: Չնայած գնին՝ 350-ից մինչեւ 550 դոլար, առցանց խանութները ժամերի կամ նույնիսկ րոպեների ընթացքում ամբողջական խմբաքանակ են վաճառում, իսկ մանրածախ խանութները, որպես կանոն, դրանք վաճառում են անհատական սկզբունքով, նախնական պատվերներով:
Նոյեմբերի 23-ին ռեփերը պատրաստվում է վաճառքի հանել Yeezy Boost 350 անվանումով մարզակոշիկների նոր տարբերակ: