Հայտնի դիզայներ Ալեքսանդր Սիրադեղյանը ներկայացրել է կոշիկների, իսկ հիմա արդեն նաեւ պայուսակների իր նոր հավաքածուն։ Ցուցադրությունը տեղի է ունեցել մոսկովյան ՑՈՒՄ-ում, ուր հավաքվել էին Ալեքսանդրի յուրօրինակ աշխատանքները գնահատողներն ու սիրողները։
Նրանց թվում են ռուսական երգարվեստում հայտնի երգչուհի Քեթի Թոփուրիան, Comedy Club-ի պրոդյուսեր Արթուր Ջանիբեկյանի կինը՝ Էլինան (օրեր առաջ երեք երեխաների մայրիկը Փարիզում ներկա էր եղել նաեւ Chanel-ի ցուցադրությանը), ռուսական Vogue-ի խմբագիր Վիկտորիա Դավիդովան եւ ուրիշներ։
Ամանորի նախաշեմին կազմակերպված կոկտեյլային երեկոյին ցուցադրվել են հայտնի դիզայների նոր աշխատանքները, որոնք ինչպես միշտ ընդգծում են կնոջ ոտքի գեղեցկությունը եւ նրբագեղություն տալիս դրան։
Չնայած AleksanderSiradekian բրենդի խանութ-սրահներում (Ֆլորենցիա, Դուբայ, Փարիզ, Մոնակո, Լոնդոն, Պրահա, Ռուսաստանի տարբեր քաղաքներ, Երեւան, Թբիլիսի, Սինգապուր) կարելի է գտնել ցանկացած ոճի կոշիկ, բայց Ալեքսանդրին հաջողություն են բերել նրա «նավակ» կոշիկներն ու կլաչերը, որոնք ինքնատիպ են եւ օրիգինալ, ուստի՝ շատ պահանջված։
Լուսանկարները՝ Facebook