Elite Model Look մրցույթի 5 հաղթողները մեկնեցին Թբիլիսի
17:14 23 հոկտեմբերի, 2012Հայաստանում անցկացված Elite Model Look մրցույթի 5 հաղթողներն այսօր, հոկտեմբերի 23-ին մեկնեցին Թբիլիսի, որտեղ հոկտեմբերի 27-ին կմասնակցեն երկրորդ նախընտրական փուլին։ Հայաստանը Վրաստանում կներկայացնեն Արփինե Հարությունյանը, Վալենտինա Ակունցը, Նելլի Սայադյանը, Անուշ եւ Ալիսա Սահակյան քույրերը։ Մինչեւ երկրորդ փուլի օրը աղջիկների հետ կաշխատեն պրոֆեսիոնալ ոճաբաններ եւ մասնագետներ, ովքեր կնախապատրաստեն նրանց պատասխանատու օրվան։ Աղջիկները նաեւ կմասնակցեն Վրաստանի Kikala լավագույն մոդելային ֆոտոստուդիայի ֆոտոսեսիային։ Իսկ արդեն հոկտոմբերի 27-ի երեկոյան, ավարտական շոուից հետո, եզրափակիչ փուլի համար կընտրվեն մեկական մասնակից Հայաստանից եւ Վրաստանից։
Ինչպես ավելի վաղ հաղորդել էր NEWS.am STYLE-ը, Elite Model Look-ի քասթինգը Հայաստանում տեղի էր ունեցել հոկտեմբերի 20-ին։ Ժյուրիի անդամներն էին Elite Model Look-ի պաշտոնական ներկայացուցիչ եւ IC Model Management-ի սեփականատեր, ինչպես նաեւ Հայաստանում քասթինգի կազմակերպիչ Իա Կիցմարաշվիլին, երկու մոդել IC Model Management-ից՝ Նատիա Կաչարավան եւ Դանա Կիմաձեն, եւ «Շանթ» հեռուստաընկերության ներկայացուցիչ Մարիամ Մովսիսյանը։
«Հայաստանից թեկնածու ընտրելը բավականին հեշտ էր, աղջիկների մեծ մասը լիովին համապատասխանում էին չափանիշներին։ Մենք լավ ընտրություն ենք արել եւ, հուսով եմ, եզրափակիչ փուլ անցած հայ մասնակիցը Հայաստանը կներկայացնի լավ կողմից։ Ավելացնեմ, որ բոլոր հինգ մասնակիցներն էլ ունեն այդ ներուժը», - ասաց Իա Կիցմարաշվիլին NEWS.am Style-ի թղթակցին։
Նշենք, որ հոկտեմբերի 27-ին Թբիլիսիում երկրորդ ընտրական փուլին կմասնակցեն 5 հայ եւ 15 վրացի աղջիկներ։ Elite Model Look մրցույթի ավարտական փուլը տեղի կունենա դեկտմբերի 1-ին, Շանհայում։
