Հայաստանում իտալական ֆիլմ է նկարահանվում (Տեսանյութ)

Այս օրերին Երեւանում են Իտալիայից ժամանած կինոռեժիսորների, պրոդյուսերների, օպերատորների եւ դերասանների մի խումբ, որոնք Հայաստանում նկարահանում են նոր ֆիլմ՝ «Գագարին հյուրանոցը»։ Ֆիլմի ռեժիսորներն են Հրաչ Քեշիշյանն ու Սիմոնե Սպադան: Արդեն հայտնվել են առաջին կադրերը նկարահանման ընթացքից։

«Տնից հեռու» նախագծի հաղորդավար, երգիչ Վարդան Սարգսյանի Instagram-ի էջում հրապարակվել է հոլովակ, ինչից տեղեկանում ենք, որ երգչի քրոջը՝ Մաշա Սարգսյանին, եւս կտեսնենք այս ֆիլմում.

«Ուղիղ եթերներ հասկացա, բայց արդեն իտալական ֆիլմո՞ւմ: Քրոջս փոքրիկ դերը՝ գեղարվեստական ֆիլմում»,-գրել է հաղորդավարը:

NEWS.am STYLE-ը կապ հաստատեց Մաշայի հետ՝ մանրամասներ պարզելու նպատակով: Մեզ հետ զրույցում նա հաստատեց իտալական ֆիլմում նկարահանվելու լուրը՝ նշելով.

«Առայժմ ոչ մի նոր ինֆորմացիա չեմ կարող տալ, քանի որ արգելվում է խոսել ֆիլմի եւ այնտեղ իմ կերպարի մանրամասներից: Միայն ֆիլմի եթերում լինելուց հետո կարող եմ խոսել այդ մասին»:

Ինչ վերաբերում է ֆիլմում Մաշայի կերպարին՝ տեղեկացնենք, որ Վարդանի քույրն իրական կյանքում էլ է աշխատում բորտուղեկցորդուհի:

Սյունե Առաքելյան