Վաղը կիրակի է, իսկ դա նշանակում է` շաբաթ երեկոն կարելի է հրաշալի կերպով ավարտել ժամանցային ֆիլմի դիտմամբ:
Այս անգամ ձեր ուշադրությանն ենք ուզում ներկայացնել կատակերգական ժանրի մի ֆիլմ, որի գլխավոր դերերում հանդես են գալիս Զաք Էֆրոնը, Ադամ ԴիՎայնը, Աննա Քենդրիքն ու Օբրի Պլազան:
Ռեժիսոր Ջեք Սզումանսկիի այս կատակերգությունը երկու եղբայրների`Մայքի եւ Դեյվի մասին է: Այս երկուսը որտեղ որ հայտնվում են, իսկական, իրարանցում են ստեղծում` ալկոհոլ, թմրանյութեր, աղջիկներ, ծեծկռտուք եւ այլն:
Այս ամենը հաճախ է պատահում, հատկապես, բարեկամների հարսանեկան խնջույքների ժամանակ:
Այդ է պատճառը, որ երբ նրանց կրտսեր քույրը` Ջինը, որոշում է ամուսնանալ, նա իր եղբայրների առջեւ մի պայման է դնում: Իր հարսանիքին Մայքն ու Դեյվը պետք է գան միայն հարսանացուների հետ: Նրա համոզմամբ, եթե տղաներից յուրաքանչյուրը ներկայանա որեւէ դաստիարակված, գեղեցիկ եւ համեստ աղջկա հետ, միայն այդ դեպքում բոլորը կկարողանան խուսափել ավելորդ սկանդալներից:
Իսկ ի՞նչ անել, եթե ոչ ընկերուհի ունես, ոչ էլ հարսնացու: Դե, իհարկե` պետք է հայտարարություն տարածել: Իսկ եթե հաշվի առնենք այն փաստը, որ Ջինի հարսանիքը կայանալու է Հավայան կղզիներում, ապա հարսանացուների քասթինգը հաստատ թեժ է լինելու:
Ի վերջո, տղաներին հաջողվում է գտնել իրենց երազանքների համեստ եւ զուսպ գեղեցկուհիներին: Սակայն ամեն ինչ իրականում շատ ավելի խճճված է:
Եթե կատակերգության սիրահար եք, ուրեմն երեկոյան անպայման դիտեք 2016 թ-ին նկարահանված այս ֆիլմը: Այն հագեցած է դրական էմոցիաներով եւ հումորային դրվագներով:
Սյունե Առաքելյան