Մինչ մոլորակը քննարկում է Սուպերբոլի եզրափակիչում Լեդի Գագայի ելույթը, կինոմանների ուշադրության կենտրոնում խաղի գովազդային ընդմիջման ժամանակ հայտնված «Կարիբյան ծովի ծովահենների» շարունակության՝ Pirates of the Caribbean: Dead Men Tell No Tales ֆիլմի նոր թրեյլերն է:
Ընդամենը մի քանի վայրկյան, բայց կադրերում, ամեն դեպքում, հայտնվել է կեղտոտ եւ ռոմի շիշը ձեռքի կապիտան Ջեք Ճնճղուկը, որին ինքներդ էլ գիտեք՝ ով է մարմնավորում:
«Այսպիսին է ծովահենի կյանքը»,- հայտարարում է Դեփը:
19 վայրկյան տեւողությամբ հոլովակում երեւացել են նաեւ Խավիեր Բարդեմը (Դեփի հերոսի հակառակորդ կապիտան Սալազար) եւ Օռլանդո Բլումը (Ուիլ Թերներ):
Նոր ֆիլմի սյուժեի համաձայն՝ այս անգամ Ջեքն ընկերների հետ գնում է Պոսեյդոնի հզոր եռաժանին որոնելու, որը ծովերի վրա լիարժեք հսկողություն է նվիրում իր տիրոջը: Միայն եռաժանին կարող է օգնել փրկվել Սալազարից ու նրա կողմնակիցներից:
Ֆիլմը համաշխարհային կինովարձույթում կհայտնվի մայիսի 24-ին: