Գյումրիի Ֆրիտյոֆ Նանսենի անվան մանկատան սան Անգելինա Պապիկյանը շուտով հայտնվելու է ռուսական «Ты супер!» երաժշտական նախագծում, որին մասնակցում են նախկին ԽՍՀՄ-ի պետությունների մանկատների եւ խնամքի կենտրոնների երեխաները։ Հեռուստաշոուի նկարահանումները սկսված են, եւ մասնակիցները արդեն պատրաստ են իրենց ելույթներին։
Սակայն 15-ամյա Անգելինան Ռուսաստանում հանդիպել է որոշ դժվարությունների, հատկապես լեզվական։ Հայաստանի ներկայացուցչին աջակցելու է եկել Comedy Cluby-ի պրոդյուսեր Գարիկ Մարտիրոսյանը։ Նա Անգելինային է նվիրել խաղալիք պինգվին։ Բայց այսքանով անակնկալները չեն ավարտվել․Գարիկը դարձել է փոքրիկ հայուհու անձնական թարգմանիչը եւ օգնել նրան նախագծի ժյուրիի անդամների հետ շփվելիս։
«Հիմա ես կարող եմ պաշտոնապես աշխատել որպես թարգմանիչ: Հուսով եմ, փոքրամարմին իմ մեծ ղեկավարը գոհ է մատուցվող ծառայությունների որակից։ Ես այս մրցույթում Անգելինային անկեղծորեն մաղթում են հաղթանակ, եւ իմ ու ամբողջ Հայաստանի անունից ասում նրան. «Մենք հպարտանում ենք քեզնով, առա՛ջ»,- ասել է Գարիկը։
Նշենք, որ «Ты супер!»՝ ռուսական НТВ հեռուստաալիքի նոր երաժշտական նախագծի մեկնարկը կտրվի փետրվար 11-ից:
Աղբյուրը՝ НТВ