Չէի ցանկանա լինել այնպիսին, ինչպիսին 21 տարեկանում էի. Ռոբի Ուիլյամսը նշում է ծննդյան 43-ամյակը
16:34 13 փետրվարի, 2017Բրիտանացի հայտնի երգիչ Ռոբի Ուիլյամսն այսօր նշում է ծննդյան 43-ամյակը:
Ուիլյամսը համարվում է Բրիտանյիայի ամենահապահանջված եւ ճանաչված երգիչներից մեկը: Չնայած ԱՄՆ-ում երգչի ձայնասկավառկներն այնքան էլ ակտիվ չեն վաճառվում` ամբողջ աշխարհում դրանց վաճառքը կազմում է ավելի քան 59 միլիոն օրինակ:
Երաժիշտը հիմնականում ստեղծագործում է փոփ, փոփ-ռոք եւ սոֆթ-ռոք ժանրերում: Յուրահատուկ ճաշակի եւ տեմբրի շնորհիվ` հայտնի երգիչ Էլթոն Ջոնը Ուիլյամսին անվանել է «21-րդ դարի Ֆրենկ Սինատրա»:
Կյանքի լավագույն պահերի, մտավախությունների եւ երաժշտության մասին. ներկայացնում ենք Ռոբի Ուիլյամսի արտահայտած մտքերից մի քանիսը:
«Պետք չէ զղջալ արածների համար: Կյանքն այնքան կարճ է, որպեսզի սկսեմ ափսոսել այն ամենի համար, ինչ ասել եմ նախկինում»:
«Մարդիկ փոխվում են: Օրինակ` ես չէի ցանկանա լինել այնպիսին, ինչպիսին 21 տարեկանում էի»:
«29 տարեկանում մտածում էի միայն այն մասին` արդյոք դեռ երգելո՞ւ եմ 50 տարեկան հասակում»:
«Կյանքիս լավագույն պահերը տեղի են ունեցել այն ժամանակ, երբ թմրանյութերի ազդեցության տակ եմ եղել: Ես էլի կանեի դա, եթե ինքս ինձ համար համոզիչ արդարացում գտնեի»:
«Ինձ դուր է գալիս իմ կյանքը: Ես դեռ այնքան նպատակներ ունեմ իմ առջեւ»:
«Չկա իմ կյանքում որեւէ բան, որը շատ եմ արժեքավորում: Իրերը, պարզապես, իրեր են»:
«Ես սիրում եմ լսել լավ երաժշտություն: Այդ պատճառով էլ անընդհատ լսում եմ իմ ձայնասկավառակը»:
«Ներսումս, ասես, մի գեր մարդ կա, որը շատ է ցանկանում այնտեղից դուրս գալ»:
«Ես կիրթ մարդ չեմ: 16 տարեկանում թողել եմ դպրոցը եւ չունեմ որեւէ մասնագիտություն»:
«Ես դեռ փորձում եմ հասկանալ, թե որն է համարվում փոփ երաժշտություն: Բայց, իհարկե, ես փոփ ժանրի կատարող եմ»:
«Բոլոր նրանք, ովքեր հասել են բարձրունքի, եղել են պայքարող, զգացմունքային եւ մի քիչ խենթ»:
Սյունե Առաքելյան