Ֆրանսիայում շուտով կմեկնարկի Քիմ Քարդաշյանին կողոպտելու գործով դատական գործընթացը:
Հիշեցնենք, որ հայուհուն Փարիզում կողոպտել էին անցյալ տարվա հոկտեմբերին, Նորաձեւության շաբաթվա ընթացքում:
Այն ժամանակ ռեալիթի շոուի աստղի հյուրանոց էին ներխուժել ոստիկանի համազգեստով հինգ անձինք: Հանցագործները 9 մլն դոլար արժողությամբ թանկարժեք զարդեր են տարել, այդ թվում՝ Քանյե Ուեսթի նվիրած 3.5 մլն դոլարանոց մատանին:
Ֆրանսիական TF1 հեռուստաալիքը հանցագործության վայրից կադրեր է ցուցադրել:
Նյութը ֆրանսիական ալիքին փոխանցել է ոստիկանությունը:
Կադրերում երեւում են Քիմի մահճակալը, ինքնակպչուն ժապավեն եւ պարան, որով կապել են հայուհուն:
Հետաքրքիր է, որ կողոպուտից հետո ոստիկանությունը հայտարարել էր, որ տեսագրություն չունի, եւ որ ոչ մի տեսախցիկ չի կարողացել արձանագրել հանցագործներին: Դա, փաստորեն, արվել է հանցագործների աչալրջությունը թուլացնելու համար:
Հանցագործների անձի մասին ոստիկանությունն իմացավ անմիջապես, քանի որ հանցագործության վայրում նրանք անզգույշ են գործել, իսկ ԴՆԹ-ի փորձաքննությունը մատնանշել է Ֆրանսիայում հայտնի կրկնահանցագործ 60-ամյա Օմար Քեդաշին:
Մի քանի օր անց ոստիկաններն Օմարին երեք ընկերների հետ նկատել է սրճարանում ինչ-որ հարց քննարկելիս: Դրանից հետո իրավապահներն աստիճանաբար տվյալներ են ձեռք բերել գործի բոլոր մասնակիցների մասին:
Բացի այդ՝ հանցագործներից երկուսին «բռնացրել» են փախուստի ժամանակ արձանագրված տեսագրությունում, երբ նրանք մատանի են վայր գցել եւ չեն կարողացել գտնել:
Մեկ օր անց մի անցորդ մայթեզրին գտել է մատանին եւ փոխանցել ոստիկանությանը:
Ամեն դեպքում՝ Քիմն այլեւս հետ չի ստանա իր թանկարժեք զարդերը, քանի որ դրանց հետքը կորել է Բելգիայի սեւ շուկայում: Իսկ կողոպտիչներին երկարատեւ բանտարկություն է սպասվում, դատավորներն էլ առաջիկայում Լոս Անջելես կմեկնեն՝ Քիմի հետ կողոպուտի մանրամասների շուրջ զրուցելու համար:
Աղբյուրը՝ Daily Mail