«Չես կարող գումար աշխատել այն երաժշտությամբ, որը ես սիրում եմ». Մարտա Կիրակոսյան

Երգարվեստում տեւական դադարից հետո Մարտա Կիրակոսյանին երաժշտասերները կրկին տեսան աշնանը մեկնարկած «Դեպի Եվրատեսիլ» նախագծում, որտեղ նա ֆավորիտների շարքում էր: Մարտան հասավ նախագծի եզրափակիչ փուլ, սակայն «Եվրատեսիլ»-ի ուղեգիրը զիջեց Արծվիկին:

NEWS.am STYLE-ը երգչուհու հետ զրուցել է «Դեպի Եվրատեսիլ»-ի եւ առաջիկա ծրագրերի մասին.

-Մարտա, «Դեպի ԵՎրատեսիլ»-ից հետո երկրպագուներիդ թիվն ավելացավ: Համոզված ենք` նրանց կհետաքրքրի, թե առաջիկայում ինչ նորություններով ես ներկայանալու:

-Ես երբեք չեմ խոսում առաջիկա ծրագրերիս մասին, որովհետեւ ամեն ինչ կամ շատ անկանխատեսելի է լինում, կամ կանխատեսելի, բայց վերջում չի ստացվում (ժպտում է): Բնականաբար, ունեմ մեծ ցանկություն` անելու մի լավ ու որակով աշխատանք: Տեսնենք` ինչպես կստացվի: Մինչեւ հիմա շատ ջերմ նամակներ եմ ստանում այն մարդկանցից, որոնք հետեւել են «Դեպի Եվրատեսլ»-ի իմ ելույթներին: Շատ շնորհակալ եմ նրանց այդ ջերմության համար:

-Շարունակելով եվրատեսիլյան թեման, կցանկանայի անդրադառնալ «Fly With Me» երգին, որով այս տարի Հայաստանը ներկայանալու է մրցույթին: Ի՞նչ կարծիք ունես երգի մասին:

-Կարծում եմ` կա պրոֆեսիոնալ ժյուրիի մեծ թիմ, որոնք ունեն մեծ փորձ եւ ավելի լավ են հասկանում «Եվրատեսիլ»-ից եւ դրա պահանջներից: Իմ կարծիքը շատ մասնավոր է: Ես հաջողություն եմ մաղթում Արծվիկին եւ նրա թիմին: Աստված նրանց հետ:

-Սովորաբար ցանկացած նախագիծ ինչ-որ բան տալիս է մասնակցին. քեզ «Դեպի Եվրատեսիլ»-ն ի՞նչ տվեց։

-Այն ինձ պարգեւեց ջերմ ու լավ մարդկանց, որոնք գնահատեցին իմ արվեստը, եւ, իհարկե, կրկին բեմում աշխատելու փորձ ունեցա:

-Եթե կրկին լինի նման մցույթ, կմասնակցե՞ս Հայաստանը «Եվրատեսիլ»-ում ներկայացնլու համար:

-Չեմ կարող ասել…Կարծում եմ` ոչ, քանի որ ինչ-որ պետք էր, այդ մրցույթն ինձ տվեց եւ այն, ինչ ուզում էի ներկայացնել, արդեն ներկայացրել եմ (ժպտում է):

-Հետեւո՞ւմ ես «Եվրատեսիլի» ընթացքին: Ունե՞ս ֆավորիտ երգեր:

-Չեմ հետեւում մրցույթին, հետեւաբար չունեմ ֆավորիտներ։

-Մարտա, քո երգացանկը տարբերվում է հայկական երգարվեստում: Հե՞շտ է պահպանել այդ ոճը եւ տեղի չտալ այն ամենին, ինչ սովորաբար լսում է հեռուստադիտողը:

-Իհարկե, հեշտ է պահելը, բայց ցավալի է այն փաստը, որ չես կարող գումար աշխատել այն երաժշտությամբ, որը ես սիրում եմ:

Սյունե Առաքելյան